बेस्ट कामगार मुंबईचे वैभव
प्रवीण दरेकर : त्यांच्या आयुष्यात सुख आणू
मुंबई, ता. १६ : नारायण राणे, विठ्ठल चव्हाण आदींनी बेस्ट कामगारांसाठी मोठी मेहनत घेतली आहे. शिवसेनेला मोठे करण्यात बेस्ट कामगारांचा वाटा आहे; मात्र या नेत्यांकडे लक्ष न देणारे शिवसेना नेते गरीब बेस्ट कामगारांकडे दुर्लक्ष करणार हे साहजिकच आहे. आता बेस्ट कामगारांनी समृद्धी पॅनेलला विजयी केल्यास त्यांच्या आयुष्यात सुखसमृद्धी येईल, अशी ग्वाही भाजप नेते प्रवीण दरेकर यांनी दिली.
दि बेस्ट एम्प्लॉईज को-ऑप. क्रेडिट सोसायटीच्या जाहीर मेळाव्यात ते बोलत होते. या मेळाव्याला समृद्धी पॅनेलचे सर्वेसर्वा आमदार प्रसाद लाड, मुंबई बँकेचे संचालक नंदकुमार काटकर, महाराष्ट्र राज्य सहकारी संघाचे अध्यक्ष रामदास मोरे, समर्थ बेस्ट कामगार संघटना, बेस्ट राष्ट्रीय कर्मचारी सेना, दि इलेक्ट्रिक युनियन, एससी-एसटी वेल्फेअर असोसिएशन आणि बहुजन एम्प्लॉईज युनियनचे पदाधिकारी व कामगार उपस्थित होते.
मोठा असूनही छोट्यांसाठी काम करणारा प्रसाद लाड आपला नेता आहे. पाच वर्षे प्रसाद लाड यांच्या खांद्याला खांदा लावून तुमच्या आयुष्यात सुख, समाधान आणण्याचा प्रयत्न करू, असा शब्दही त्यांनी या वेळी दिला. कप-बशीला मतदान करून समृद्धी पॅनेलच्या २१ जागा निवडून आणण्याचे आवाहनही त्यांनी कामगारांना केले. २५ वर्षे या पतपेढीचे नेतृत्व बेस्ट कामगार सेनेने केले. त्यांनी या पतपेढीच्या माध्यमातून चांगल्या दोन योजना आणल्याचे सांगितल्यास आम्ही ही निवडणूकच लढणार नाही, असे आव्हानही दरेकर यांनी दिले.

कामगारांना आश्वासन
एसटी कामगारांना पगार वेळेवर मिळत नाही तसाच बेस्ट कामगारांनाही पगार वेळेवर मिळत नाही. बेस्ट कामगार सेनेने या कामगारांच्या जीवनात अंधार आणला आहे. शिवसेनेने फक्त ‘क्षणभर विश्रांती’ केली. त्यांनी कामगारांच्या कष्टाच्या, घामाच्या पैशावर मजा मारली. ही मजा आता संपवून टाकायची आहे. विरोधकांकडे कार्यक्रम नाही, योजना नाहीत. आमच्याकडे योजना आहेत. या सर्व कामगारांना मेडिक्लेम देऊ. निवडणूक झाल्यावर बेस्ट एम्प्लॉईज पतपेढी व मुंबई बँक यांच्यात करार करून एकत्रितपणे घरांसाठी पैसे उपलब्ध करून देऊ, असेही दरेकर म्हणाले.