कोकणवासीयांसाठी भाजपकडून मोफत बस, ट्रेनची व्यवस्था
मुंबई, ता. २३ : गणेशोत्सवासाठी कोकणात जाणाऱ्या भाविकांसाठी मुंबई भाजपने ३५० एसटी बस आणि ट्रेनची मोफत सुविधा उपलब्ध करून दिली आहे. सांस्कृतिक कार्यमंत्री आशीष शेलार यांनी एसटीला शनिवारी (ता. २३) झेंडा दाखवून या सेवेची सुरुवात केली.

कोकणात जाणाऱ्या गणेशभक्तांना मुंबई भाजपतर्फे दरवर्षी एसटी बसची सुविधा उपलब्ध करून देण्यात येते. यावर्षीदेखील साडेतीनशेहून अधिक गाड्या उपलब्ध करून देण्यात आल्या आहेत. मुंबईच्या विविध भागांतून शनिवारपासून या बस कोकणाकडे रवाना होणार आहेत. बीकेसीमध्ये या गाड्यांचा नियंत्रण कक्ष उभारण्यात आला आहे. याच ठिकाणी या सेवेची आज सुरुवात करण्यात आली. या वेळी आमदार संजय उपाध्याय, सुहास आडिवरेकर, कमलाकर दळवी, जितेंद्र राऊत आणि पदाधिकारी या वेळी उपस्थित होते. दरम्यान, सोमवारी (ता. २५) एक विशेष रेल्वे कोकणात रवाना होणार आहे.

भाजपने कोकणवासीय आणि गणेशभक्तांना सुविधा पुरवणे, त्यांना मदत करण्याची भूमिका सातत्याने घेतली आहे. केंद्रीय रेल्वेमंत्र्यांशी बोलून कोकणात जाण्यासाठी अधिकच्या रेल्वे गाड्यांची व्यवस्था करण्यात आली आहे. भाजपचे खासदार, आमदार, माजी नगरसेवक आपापल्या विभागांतून कोकणवासीयांना त्यांच्या गावी सुखरूप नेण्यासाठी वाहनांची व्यवस्था करीत आहेत.
- आशीष शेलार, सांस्कृतिक कार्यमंत्री