म्हाडाच्या ५५६ घरांसाठी ६८,१९७ अर्ज

सकाळ वृत्तसेवा
मुंबई, ता. २३ : म्हाडाच्या कोकण मंडळाच्या लॉटरीला अभूतपूर्व प्रतिसाद मिळालेला असतानाच त्यामधील खासगी विकसकांच्या म्हणजेच २० टक्के सर्वसमावेशक गृहनिर्माण योजनेतील घरांवर अर्जदारांच्या उड्यांवर उड्या पडत आहेत. या योजनेतील ५६५ घरांसाठी आतापर्यंत तब्बल ६८,१९७ अर्ज अनामत रकमेसह प्राप्त झाले आहेत. त्यामुळे म्हाडाच्या या घरांसाठी मोठी स्पर्धा होणार असल्याचे निश्चित झाले आहे.
कोकण मंडळाच्या ५,२८५ घरांसाठी एक लाख १४ हजार २८७ अर्ज आले असून ७९ हजार १९२ लोकांनी अनामत रक्कम भरून आपला अर्ज अंतिम केला आहे. या घरांमध्ये २० टक्के सर्वसमावेशक योजनेअंतर्गत एकूण ५६५ घरे असून १५ टक्के एकात्मिक शहर गृहनिर्माण योजनेअंतर्गत ३,००२ घरे, म्हाडा कोकण मंडळ गृहनिर्माण योजना व विखुरलेली १,६७७ घरे तसेच ५० टक्के योजनेअंतर्गत ४१ घरे विक्रीसाठी उपलब्ध आहेत. ठाणे, डोंबिवली, कल्याण अशा विविध ठिकाणी ही घरे आहेत.
दरम्यान, अर्ज भरण्यासाठी चार दिवस शिल्लक असून इच्छुक अर्जदारांना २८ ऑगस्टपर्यत रात्री ११.५९ वाजेपर्यंत म्हाडाच्या संकेतस्थळावर ऑनलाइन अर्ज भरता येणार आहेत.