मुंबईचे नाक दाबले तर आरक्षणाचे तोंड उघडेल!
सरकारला ऐकावेच लागेल; आंदोलकांचा निर्धार

सकाळ वृत्तसेवा
मुंबई, ता. ३० : ‘आरक्षणाच्या मागणीसाठी मराठा समाजाने मुंबईत धडक दिली असून, मुंबई हा देशाचा श्वास आहे. येथून जर आरक्षणाची आरोळी ठोकली, तर सरकारला ऐकावेच लागेल आणि त्याचा आवाज जगभर पोहोचेल. सोमवारपासून या आंदोलनामुळे सरकारचे नाक दाबले जाईल आणि मग आरक्षणाचे तोंड उघडावे लागेल,’ असा ठाम विश्वास आंदोलक व्यक्त करीत आहेत.

मनोज जरांगे-पाटील यांनी शुक्रवारपासून आझाद मैदानावर उपोषण सुरू केले आहे. त्यांना राज्यभरातून पाठिंबा मिळत असून, आंदोलकांचा ओघ सतत वाढत आहे. मुंबई ही केवळ आर्थिक राजधानी नाही तर सत्तेचे केंद्रही आहे. त्यामुळे या आंदोलनाची दखल सरकारला घ्यावीच लागणार, असा विश्वास कार्यकर्त्यांना आहे. ‘आम्ही आतापर्यंत शांततेत आंदोलन केले. हेही शांततेतच होईल. पण गर्दी वाढत जाईल तेव्हा सरकारसमोर अडचणी उभ्या राहतील आणि त्यांच्यावर दबाव निर्माण होईल,’ असे आंदोलक सांगतात. शुक्रवारी मुसळधार पावसात आंदोलनाची सुरुवात झाली; मात्र आता शनिवारी-रविवारी सुट्टीमुळे गर्दीचा परिणाम फारसा जाणवत नाही. खरी परीक्षा सोमवारपासून सुरू होणार आहे. दैनंदिन व्यवहार, वाहतूक व्यवस्था आणि आंदोलकांची वाढती उपस्थिती यामुळे सरकारवर प्रचंड दबाव येणार आहे. ‘सरकारचे नाक दाबले जाईल आणि मग आरक्षणाचे तोंड उघडावे लागेल; दुसरा पर्याय नाही. आम्ही आरक्षणाचा निर्धार करूनच आलो आहोत, आता माघार नाही,’ असा स्पष्ट इशारा आंदोलकांनी दिला आहे.

मुंबईतून उठलेली ही आरक्षणाची हाक आता थेट मंत्रालयाच्या दारावर धडकणार आहे. सरकारने कितीही कानाडोळा करायचा प्रयत्न केला तरी या आवाजाला दाबणे अशक्य आहे.
- राम शिंदे, आंदोलक

आझाद मैदानावर उभारलेले आंदोलन हे केवळ एक ठिय्या नाही, तर मराठा समाजाच्या अस्तित्वाची आणि हक्काची निर्णायक लढाई आहे. सरकार गप्प बसले तर त्याची किंमत सत्ता गमावून मोजावी लागेल.
- योगेश भोरे, आंदोलक

मुसळधार पावसातही आंदोलन सुरू राहणे हेच दाखवून देते की मराठा समाज कोणत्याही परिस्थितीत मागे हटणार नाही. जिद्द, चिकाटी आणि निर्धार हेच आमचे शस्त्र आहे.
- संतोष शिंदे, आंदोलक

सोमवारपासून मुंबई ठप्प झाली, तर सरकारचं नाक दाबले जाईल आणि आरक्षणाचे दार उघडावंच लागेल. हा केवळ इशारा नाही, तर समाजाच्या मनातला निर्धार आहे. आता मागे वळणे शक्यच नाही.
- संजय शिंदे, आंदोलक
......