राज्य एड्स नियंत्रण संस्थेचा
आरोग्यमंत्र्यांकडून आढावा

सकाळ वृत्तसेवा
मुंबई, ता. १९ : सार्वजनिक आरोग्य व कुटुंब कल्याणमंत्री प्रकाश आबिटकर यांनी महाराष्ट्र राज्य एड्स नियंत्रण संस्थेच्या कार्याचा आढावा घेतला. या बैठकीत राज्यभरातील एचआयव्ही प्रतिबंध, उपचार आणि जनजागृतीसंबंधी उपक्रमांचे सादरीकरण करण्यात आले. या वेळी उपचारपद्धती, जनजागृती मोहिमा आणि संवेदनशील समुदायांपर्यंत प्रभावी सेवा पोहोचवण्याबाबत सविस्तर चर्चा करण्यात आली.

एड्स प्रतिबंध आणि नियंत्रणासाठी कार्यरत यंत्रणांची कार्यक्षमता वाढवणे, विविध स्तरांवर समन्वय साधणे आणि जनसामान्यांमध्ये जनजागृती वाढवण्यासाठी कृती आराखडा तयार करण्याच्या सूचना सार्वजनिक आरोग्यमंत्री आबिटकर यांनी दिल्या. या बैठकीला संस्थेचे प्रकल्प संचालक डॉ. सुनील भोकरे, आरोग्यसेवा संचालक डॉ. विजय कंदेवाड तसेच वरिष्ठ अधिकारी आणि कर्मचारी उपस्थित होते.