मोनोरेलला आजपासून
अनिश्‍चित काळ विश्रांती

प्रवाशांचे रिचार्जचे पैसे अडकले

सकाळ वृत्तसेवा
मुंबई, ता. १९ : दहा वर्षांपासून रडतखडत चालणारी मोनोरेल शनिवारपासून (ता. २०) अनिश्‍चित काळासाठी विश्रांतीवर गेली आहे. तांत्रिक बिघाडामुळे मोनोरेल सातत्याने बंद पडत असल्याने मुंबई महानगर प्रदेश विकास प्राधिकरणाने (एमएमआरडीए) अद्यावत आणि सक्षमीकरण करण्यासाठी ती बंद ठेवण्याचा निर्णय घेतला आहे. त्यामुळे या मार्गावरील वडाळा, भक्ती पार्क, म्हैसूर कॉलनी, आरसीएफ, भारत पेट्रोलियम परिसरातील प्रवाशांची गैरसोय होणार आहे. आता त्यांना ‘बेस्ट’सह टॅक्सी, खासगी वाहतुकीवर अवलंबून राहावे लागणार आहे.

मुंबईकरांना वाहतूक कोंडीशिवाय गारेगार प्रवास करता यावा म्हणून राज्य सरकारने तब्बल अडीच हजार कोटी रुपये खर्चून चेंबूर-संत गाडगे महाराज चौक, सात रस्त्यादरम्यान २० किलोमीटर लांबीचा मोनोरेल प्रकल्प उभारला आहे. कमी प्रवासी संख्येमुळे पांढरा हत्ती ठरलेली मोनोरेल काही महिन्यांत सातत्याने तांत्रिक बिघाडामुळे बंद पडत आहे. त्यामुळे एमएमआरडीएने तूर्तास मोनोरेल थांबवून आवश्यक कामे करण्याचा निर्णय घेतला आहे. तसेच नवीन सिग्नल यंत्रणा बसवणे, नवीन गाड्यांच्या अनुषंगाने अद्ययावत केले जाणार आहे.
-----
रिचार्जचे पैसे अडकले
मोनोरेलने नियमित प्रवास करणारे प्रवासी वारंवार तिकीट खिडकीवर तिकिटासाठी जावे लागू नये म्हणून मोनोरेलने जारी केलेल्या कार्डवर प्रवास करतात. त्यामध्ये आधी बॅलन्स टाकावा लागतो. एमएमआरडीएने अचानक मोनोरेलचे संचलन बंद केल्याने आगाऊ रिचार्ज केलेल्या अनेक प्रवाशांचे पैसे अडकून पडणार आहेत. याबाबत एमएमआरडीएकडे विचारणा केली असता प्रवाशांना रिचार्जची व्हॅलिडिटी वाढवता येते. मोनोरेल चालू होईल तेव्हा त्याचा वापर करता येईल, असे सांगण्यात आले.