नवरात्र, दिवाळीसाठी पोलिसांचे
प्रतिबंधात्मक आदेश जारी
मुंबई, ता. २९ ः सामाजिक, धार्मिक एकोपा, कायदा व सुव्यवस्था आणि अंतर्गत सुरक्षा कायम राखण्यासाठी मुंबई पोलिसांनी नवरात्र, दिवाळीसह पुढील दोन महिन्यांसाठी प्रतिबंधात्मक आदेश सोमवारी (ता. २९) जारी केले. या आदेशानुसार देवीच्या मूर्ती विसर्जित झाल्यानंतर समुद्रकिनारी वाहून येणाऱ्या अवशेषांचे फोटो, व्हिडिओ काढणे, ते पोस्ट करण्यास बंदी असेल. शिवाय छत्रपती शिवाजी महाराज विमानतळ आणि परिसरात हाय राईज फटाके, प्रकाश उत्सर्जित करणाऱ्या वस्तू सोडणे, लेझर बीम, पतंग किंवा फुगे सोडणे, पॅराग्लायडिंग यामुळे व्यावसायिक विमानांच्या दळणवळणात अडथळे निर्माण होत असल्याने पुढील दोन महिने यावर बंदीचे आदेश देण्यात आले आहेत, याबाबत तक्रारी प्राप्त झाल्याने पोलिस आयुक्तालयाने आदेश जारी केल्याचे सांगण्यात आले आहे. या आदेशाचे उल्लंघन होत असल्यास त्याबाबतची माहिती नजीकच्या पोलिस ठाण्यास किंवा पोलिस नियंत्रण कक्षास कळवावी, असे आवाहन पोलिस प्रशासनाकडून देण्यात आले आहे.