मालमत्ता कर सवलतीचा संदेश बनावट
मुंबई, ता. १७ : समाजमाध्यमावर फिरत असलेला ‘ज्येष्ठ नागरिकांना निवासी मालमत्तेवर ३० टक्के करसवलत’ हा संदेश पूर्णपणे बनावट असल्याचे महापालिका प्रशासनाने सोमवारी स्पष्ट केले आहे. अफवेमुळे अनेक ज्येष्ठ नागरिक वॉर्ड कार्यालयांत चौकशीसाठी गर्दी करत असल्याचेही पालिकेने सांगितले.
पालिकेनुसार महानगरपालिका अधिनियम १८८८ मध्ये अशी कोणतीही तरतूद नाही. त्यामुळे ज्येष्ठ नागरिकांनी वॉर्ड कार्यालयात अनावश्यक ये-जा करणे टाळावे, असे आवाहन करण्यात आले आहे. महापालिकेने सांगितले की, ‘१ जानेवारी २०२२ पासून ५०० चौरस फुटांपेक्षा कमी निवासी मालमत्तांना करसवलत लागू आहे. तसेच माजी सैनिक, त्यांच्या विधवा आणि अविवाहित शहीद सैनिकांच्या कुटुंबीयांना एका मालमत्तेवर (शासनाचे कर वगळून) सवलत देण्यात येते.
शहरातील नागरिकांनी बनावट संदेशांवर विश्वास न ठेवता केवळ अधिकृत माहितीच तपासावी.’ असे महापालिकेने स्पष्ट केले आहे.