मध्य रेल्वेवर रात्रकालीन मेगाब्लॉक

मुंबई, ता. २० ः डेडिकेटेड फ्रेट कॉरिडॉर प्रकल्पांतर्गत शिळफाटा येथील जुना रोड ओव्हर ब्रिज हटवण्याचे महत्त्वाचे काम सुरू असल्यामुळे मध्य रेल्वेने निळजे आणि दातिवलीदरम्यान चार दिवस विशेष ट्रॅफिक आणि पॉवर ब्लॉक जाहीर केला आहे. हा ब्लॉक २५ नोव्हेंबर, ३० नोव्हेंबर, २ डिसेंबर, ७ डिसेंबर रोजी रात्री १.१० ते ४.१० वाजेपर्यंत राहील. या ब्लॉक कालावधीत ट्रेन क्रमांक १२१३४ मंगळूर-छत्रपती शिवाजी महाराज टर्मिनस सुपरफास्ट एक्स्प्रेस ही गाडी सर्व चारही दिवशी कळंबोली येथे तब्बल ५० मिनिटे थांबवावी लागणार आहे. याशिवाय या कालावधीत ट्रेन क्रमांक २२१९३ दौंड-ग्वाल्हेर सुपरफास्ट एक्स्प्रेसला कर्जत- कल्याण- वसई रोडमार्गे वळविण्यात येईल. या गाडीला प्रवाशांच्या सोयीसाठी कल्याण येथे विशेष थांबा देण्यात येणार आहे.