भाजलेल्‍या रुग्‍णांवर उपचार सुलभ
केईएममध्ये जळीत रुग्ण उपचार केंद्राचे लोकार्पण; अतिदक्षता कक्षात अद्ययावत वैद्यकीय संयंत्रांचा समावेश
सकाळ वृत्तसेवा
मुंबई, ता. १४ ः परळ येथील केईएम रुग्णालयात नूतनीकरण करण्यात आलेल्या जळीत रुग्ण उपचार केंद्राचे (बर्न केअर सेंटर) लोकार्पण शनिवारी (ता. १३) शैलेश लिमडी यांच्या हस्ते करण्यात आले.
या केंद्रामध्ये जळीत रुग्णांसाठी अद्ययावत वैद्यकीय सुविधा उपलब्ध करून देण्यात आल्या असून, महिला व बालकांसह आता पुरुष रुग्णांनाही उपचाराची सुविधा देण्यात येणार आहे. या केंद्रामार्फत वर्षाला सुमारे १५० ते १७० जळीत रुग्णांवर उपचार करणे शक्य होणार आहे. लोकार्पण सोहळ्यास केईएम रुग्णालयाच्या अधिष्ठाता डॉ. संगीता रावत, प्लॅस्टिक सर्जरी विभागाच्या प्रमुख डॉ. विनिता पुरी, रुग्णालयातील विविध विभागांचे प्रमुख व मान्यवर उपस्थित होते.
भाजलेल्या व जळीत रुग्णांना तातडीने व योग्य वेळी उपचार मिळावेत, यासाठी अद्ययावत सुविधा उपलब्ध करून देण्याचे निर्देश महापालिका आयुक्त भूषण गगराणी यांनी दिले होते. तसेच अशा रुग्णांना संसर्गाचा धोका टाळण्यासाठी आवश्यक उपाययोजना करण्याच्या सूचना अतिरिक्त महापालिका आयुक्त (पश्चिम उपनगरे) यांनी दिल्या होत्या. विविध शासकीय योजनांच्या माध्यमातून गरजू रुग्णांना दर्जेदार वैद्यकीय सेवा देणे हे या केंद्राचे प्रमुख उद्दिष्ट असल्याची माहिती उपायुक्त (सार्वजनिक आरोग्य) शरद उघडे यांनी दिली.
रुग्णांच्या सोयीसाठी कक्षामध्ये आधुनिक फर्निचर, योग्य प्रकाशव्यवस्था उपलब्ध करून देण्यात आली आहे. उपचारादरम्यान होणाऱ्या वेदनांपासून लक्ष विचलित व्हावे, या उद्देशाने कक्षामध्ये दूरदर्शन संचही बसविण्यात आले आहेत. तसेच तातडीच्या उपचारांसाठी सुसंगत रचनेचा स्वतंत्र उपचार कक्ष निर्माण करण्यात आला असून प्रशिक्षित वैद्यकीय पथक सदैव कार्यरत राहणार आहे.
रुग्णांना संसर्गाचा धोका होऊ नये, यासाठी कक्षातील प्रवेश नियंत्रित ठेवण्यात आला असून रुग्णांची ने-आण सुलभ होईल, अशा पद्धतीने संपूर्ण रचना करण्यात आली आहे. रुग्णांच्या सुरक्षितता व काळजीसाठी सर्व आवश्यक व्यवस्था करण्यात आल्याची माहिती डॉ. संगीता रावत यांनी दिली. हा प्रकल्प केईएम रुग्णालयाच्या दृष्टीने महत्त्वाकांक्षी असून जळीत रुग्णांच्या अद्ययावत उपचारांसाठी पायाभूत सुविधा सातत्याने विकसित करण्यासाठी प्लॅस्टिक सर्जरी विभाग कटिबद्ध असल्याचे नमूद करण्यात आले.
जळीत जखमा या रुग्णांच्या आयुष्यावर वैद्यकीय, भावनिक तसेच सामाजिकदृष्ट्या मोठा परिणाम करणाऱ्या असतात. अशा रुग्णांना उपचारांसोबतच आधार व नवी आशा देण्याची जबाबदारी जळीत रुग्ण उपचार केंद्राची आहे. रुग्णांशी सन्मानपूर्वक व मानवीय दृष्टिकोनातून वागून सुरक्षित व कार्यक्षम सेवा देण्यासाठी आमचा संपूर्ण चमू कटिबद्ध असल्याचे विभागप्रमुख डॉ. विनिता पुरी यांनी सांगितले.

प्रभावी उपचार
या केंद्रात १२ रुग्णशय्या सर्व आवश्यक सुविधांसह उपलब्ध करून देण्यात आल्या आहेत. येथे संपूर्ण सुविधांनी सुसज्ज असे अतिदक्षता उपचार कक्ष (आयसीयू) कार्यरत असून त्यामध्ये व्हेंटिलेटर, मल्टी-पॅरामीटर मॉनिटर, अद्ययावत वैद्यकीय उपकरणे तसेच डायलिसिस मशीनचा समावेश करण्यात आला आहे. या सुविधांमुळे जळीत रुग्णांच्या उपचारादरम्यान उद्भवणाऱ्या गुंतागुंतींवर अधिक प्रभावीपणे उपचार करणे शक्य होणार आहे.