कौटुंबिक वादातून तरुणाची हत्या
बहिणीच्या पतीविरोधात गुन्हा नोंद
सकाळ वृत्तसेवा
मुंबई, ता. ३ ः दारुड्या पतीच्या मारहाणीतून बहिणीला वाचवण्यासाठी मध्ये पडलेल्या तरुणाची हत्या झाली. रविवारी रात्री विलेपार्ले येथील शास्त्रीनगर परिसरात घडली. सागर गुप्ता (२४) असे मृत तरुणाचे नाव आहे. त्याच्या हत्येप्रकरणी विमानतळ पोलिसांनी बहिणीचा पती आकाश मौर्यविरोधात गुन्हा नोंदवून तपास सुरू केला.
पोलिसांनी दिलेल्या माहितीनुसार, मृत सागरची बहीण ममता (२६)चे २०२१ला आकाशसोबत लग्न झाले. आकाशला दारूचे व्यसन होते. तो नशेत क्षुल्लक कारणावरून ममताला वरचेवर मारझोड करी. वाद विकोपाला गेले, मारहाणीने गंभीर वळण घेतले की सागर किंवा त्याची आई दोघांमध्ये मध्यस्थी करून वेळ मारून नेत.
रविवारी रात्रीही आकाशने नशेत ममताला मारहाण सुरू केली. नेमका सागर तेथेच होता. तो मध्ये पडला आणि आकाशसोबत त्याची झटापट सुरू झाली. दरम्यान, आकाशने धारदार चाकू सागरच्या गळ्यावर फिरवला. सागर रक्ताच्या थारोळ्यात पडल्याचे पाहून भानावर आलेला आकाश तेथून पसार झाला. सागरला तातडीने व्ही. एन. देसाई रुग्णालयात नेण्यात आले; मात्र उपचार मिळण्यापूर्वीच त्याचा मृत्यू झाला होता.