अपहृत तरुणाला देहविक्रीस भाग पाडणारा अटकेत
मुंबई, ता. १९ : अल्पवयीन तरुणाचे अपहरण करून तृतीयपंथीच्या वेशात त्यास भिक्षा मागण्यास, देहविक्रीस भाग पाडणाऱ्या आरोपीला गुन्हे शाखेने नवी मुंबईतून अटक केली. बाबू आयनल खान ऊर्फ बाबू गुरू ऊर्फ बाबू (३०) असे त्याचे नाव असून, तो बांगलादेशी नागरिक आहे. गोवंडी परिसरात राहणाऱ्या १७ वर्षीय तरुणाचे अपहरण करून आरोपीने त्याला तृतीयपंथीच्या वेशात उपनगरीय लोकल गाड्यांमध्ये भीक मागण्यास भाग पाडले. त्यानंतर त्याच्याकडून देहविक्री करून घेतली. या कृत्याची माहिती गुन्हे शाखेचे प्रभारी निरीक्षक भरत घोणे यांना प्राप्त झाली. त्याआधारे पथकाने आरोपीस अटक केली. आरोपी खानविरोधात हत्या, अपहरणाचे गुन्हे नोंद आहेत. विशेष म्हणजे अवैधरीत्या देशात घुसखोरी केल्याप्रकरणी त्याला अटक झाली होती. त्या खटल्यातून तो जामिनावर सुटला होता.