हार्बर मार्गावर रविवारी मेगाब्लॉक
सकाळ वृत्तसेवा
मुंबई, ता. २३ : मध्य रेल्वेने रविवारी (ता. २६) हार्बर मार्गावर मेगाब्लॉक जाहीर केला आहे. छत्रपती शिवाजी महाराज टर्मिनस ते चुनाभट्टी/वांद्रे यादरम्यान अप व डाऊन मार्गांवर सकाळी ११.४० ते सायंकाळी ४.४० या वेळेत मेगाब्लॉक घेण्यात येणार आहे. या कालावधीत विविध अभियांत्रिकी व देखभाल कामे हाती घेण्यात येणार असल्याचे रेल्वे प्रशासनाने सांगितले.

ब्लॉकदरम्यान सीएसएमटीहून वाशी, बेलापूर, पनवेल तसेच वांद्रे, गोरेगावकडे जाणाऱ्या अनेक लोकल सेवा रद्द राहणार आहे. परतीच्या फेऱ्यांवरही परिणाम होणार आहे. त्यामुळे हार्बर मार्गावरील प्रवाशांची मोठी गैरसोय होण्याची शक्यता आहे. या पार्श्वभूमीवर पनवेल-कुर्ला यादरम्यान दर २० मिनिटांनी विशेष लोकल गाड्या चालविण्यात येणार आहेत. तसेच सकाळी १० ते सायंकाळी ६ या वेळेत हार्बर मार्गावरील प्रवाशांना मेन लाइन व पश्चिम रेल्वेमार्गे प्रवास करण्याची विशेष मुभा देण्यात आली आहे. दरम्यान, छत्रपती शिवाजी महाराज टर्मिनस-कल्याण मुख्य मार्गावर कोणताही मेगाब्लॉक नसल्याचे रेल्वेने स्पष्ट केले आहे.