...तर रस्त्यावरच फोडून काढू!
अमित ठाकरेंचा रिक्षाचालकांना इशारा

सकाळ वृत्तसेवा
​मुंबई, ता. २५ ः राज्य सरकारने घेतलेल्या मराठी भाषेच्या निर्णयाला विरोध करीत काही परप्रांतीय रिक्षाचालकांनी संप पुकारण्याची तयारी केली आहे. यावर महाराष्ट्र नवनिर्माण सेनेचे नेते अमित ठाकरे यांनी संपाच्या नावाखाली दादागिरी करणाऱ्यांना ‘मनसेस्टाइल’ इशारा दिला. संपाच्या नावाखाली मराठी रिक्षाचालकांना अडवण्याचा प्रयत्न केल्यास रस्त्यावरच फोडून काढू, असे त्यांनी ठणकावून सांगितले.
​मराठी भाषेची सक्ती हा सरकारचा योग्य निर्णय आहे. मनसे या निर्णयाच्या पाठीशी खंबीरपणे उभे आहे. ज्यांना संपावर जायचे आहे, त्यांनी खुशाल जावे; पण संपाच्या नावाखाली तुम्ही मराठी रिक्षाचालकांना अडवण्याचा प्रयत्न केल्यास गाठ आमच्याशी आहे. एवढीच कणव असेल, तर मराठी भाषा शिकून घ्या, आमची हरकत नाही; पण मराठी माणसाला त्रास दिलात, तर रस्त्यावरच मार खाल, अशा शब्दांत ठाकरे यांनी परप्रांतीय रिक्षाचालकांना इशारा दिला.