दोषी अधिकाऱ्याच्या
निवृत्तिवेतनात कपात
बाबू गेनू इमारत दुर्घटना प्रकरण

सकाळ वृत्तसेवा
मुंबई, ता. ९ : डॉकयार्ड रोड येथे २७ सप्टेंबर २०१३ रोजी झालेल्या बाबू गेनू इमारत दुघटनेसाठी महापालिकेच्या इमारत परिरक्षण विभागातील अधिकारी विलास सागवेकर दोषी ठरले; मात्र आता ते सेवानिवृत्त झाल्याने त्यांच्या निवृत्तिवेतनातून दरमहा ५० टक्के दराने आठ वर्षांसाठी कपात करण्याबाबतचा प्रस्ताव सोमवारी होणाऱ्या स्थायी समितीच्या बैठकीसाठी सादर करण्यात आला.
बाबू गेनू इमारत कोसळून झालेल्या दुर्घटनेत ६१ जणांचा मृत्यू, तर ३१ जण जखमी झाले होते. या दुर्घटनेस जबाबदार अधिकारी व संबंधितांवर कारवाई करण्यात आली. तसेच या घटनेस महापालिकेच्या इमारत परिरक्षण विभागातील उपप्रमुख अभियंता विलास सागवेकर यांना जबाबदार धरले होते. सागवेकर यांच्याविरुद्ध करण्यात आलेल्या खात्यांतर्गत सर्वंकष चौकशीअंती दोषारोपातील आरोप सिद्ध झाले. त्यानुसार महापालिका आयुक्तांनी त्यांचे मूळ निवृत्तिवेतनातून दरमहा ५० टक्के दराने आठ वर्षांसाठी कपात करण्यात यावी, अशी शिक्षा करण्याचे आदेश देण्यात आले. याबाबतचा प्रस्ताव सोमवारी होणाऱ्या स्थायी समितीत मंजुरीसाठी सादर करण्यात आला आहे.