मुरूड - रायगड जिल्हा वाहतूक शाखेने नियमबाह्य वाहन चालवणाऱ्यांवर कारवाईचा बडगा उगारला आहे. सिग्नल तोडणे, परवाना नसणे, दुचाकींवरून ट्रीपल सीट जाणे, अतिवेगात वाहने चालविणे, वाहन चालवताना मोबाइलवर बोलणे, सीट बेल्ट न लावणे आदी वाहतूक नियमांची पायमल्‍ली करणाऱ्यांविरोधात वाहतूक पोलिसांनी मोहीम सुरू केली आहे.

जिल्ह्यात २०२२ मध्ये वाहतूक विभागाने २० हजार ८३४ वाहनचालकांविरुद्ध कारवाई करीत तब्बल ६२ लाख ९६ हजार ५०० रुपयांचा दंड वसूल केल्‍याची माहिती रायगड वाहतूक शाखेच्या पोलिस निरीक्षक सुवर्णा पत्की यांनी दिली. तर २०२१ मध्ये वाहतूक शिस्त न पाळणाऱ्या २४ हजार ०३४ चालकांकडून ७९लाख सात हजारांचा दंड वसूल करण्यात आला. वाहतूक नियमांची चालकांना माहिती मिळावी, यासाठी वाहतूक विभागाकडून नियमित जनजागृती उपक्रम राबवले जात असल्‍याचे यावेळी पत्‍की यांनी सांगितले.