मुरूड, ता. १९ (बातमीदार)ः शेकापमधील तीन दशकांच्या राजकीय कारकिर्दीत आमदार जयंत पाटील, माजी आमदार पंडित पाटील यांनी खूप सन्मान दिला, मात्र तरुणांचे नेतृत्व करणाऱ्या चित्रलेखा पाटील यांच्याकडून सातत्‍याने उपेक्षा होत असल्‍याचे स्‍पष्‍ट करीत शेकापचे रायगड जिल्हा सहचिटणीस मनोज भगत यांनी सोमवारी शेकडो कार्यकर्त्यांसह राष्ट्रवादीच्या अजित पवार गटात प्रवेश केला. यावेळी
रायगडचे खासदार सुनील तटकरे, राज्याचे कृषीमंत्री धनंजय मुंढे उपस्‍थित होते. भगत यांनी दिघी पोर्ट, ड्रग पार्कमध्ये स्थानिक युवकांना संधी देण्याची मागणी केली. तर अजित कासार यांनी मुरूड तालुक्याचा विकासासाठी तटकरे यांच्या कार्यप्रणालीवर विश्वास ठेवून प्रवेश करीत असल्‍याचे सांगितले.
नवीन-जुने असा कार्यकर्त्यांमध्ये भेद न करता विकास कामांमध्ये कुठेही व्यत्यय येणार नसल्याची ग्वाही देत पक्ष प्रवेश करून पश्चात्ताप होणार नाही, याची खबरदारी घेऊ असे आश्वासन खासदार सुनील तटकरे यांनी प्रवेशकर्त्यांना दिले. इंडिया आघाडीचे माजी खासदार अनंत गीते यांनी मतदारांचा विश्वास गमावला आहे. सहा वेळा खासदारकी व मंत्री पद भूषवले परंतु रायगडमध्ये कोणतेही काम न केले नसल्‍याचा टोला तटकरेंनी लगावला.

सत्ता-समीकरणे बदलत असतात राष्ट्रवादीने पक्षिय भूमिका कायम ठेवत देशाच्या विकासासोबत पुरोगामी महाराष्ट्राचा गतिशील विकास व्हावा, यासाठी महायुतीत सहभागी होण्याचा निर्णय घेतला आहे. बॅ. ए.आर. अंतुले यांचे सागरी महामार्गाचे स्वप्न लवकरच पूर्ण होईल.
- धनंजय मुंडे, कृषीमंत्री