केशवराव खांबेटे सार्वजनिक वाचनालयात अभिजात मराठी भाषा दिन उत्साहात
म्हसळा (बातमीदार) ः केशवराव खांबेटे सार्वजनिक वाचनालयात अभिजात मराठी भाषा वर्धापन दिन उत्साहात साजरा करण्यात आला. कार्यक्रमाचे अध्यक्षस्थान ज्येष्ठ साहित्यिक व निवृत्त शिक्षक विलास यादव यांनी भूषविले. कार्यक्रमाची सुरुवात दीपप्रज्वलन, सरस्वती पूजन व महाराष्ट्र गीताने झाली. मराठी भाषेचा इतिहास, सांस्कृतिक वारसा आणि अभिजाततेचे महत्त्व या विषयांवर प्रा. रायप्पा माशाळे, अपर्णा ओक, सुनील उमरोटकर, कीर्तीमाला विचारे आणि रमेश जाधव यांनी मनोगत व्यक्त केले. वक्त्यांनी कवितांद्वारे मराठी भाषेचे संवर्धन व जपणुकीचा संदेश दिला. या वेळी कृषी अधिकारी दत्तात्रय शिंदे, दिलीप करंबे, अशोक काते, रामेश्वर मगर यांच्यासह विविध मान्यवर उपस्थित होते. अध्यक्षीय भाषणात विलास यादव यांनी मराठीच्या अभिजाततेचा गौरव केला व अशा उपक्रमांमुळे भाषा नव्या पिढीपर्यंत पोहोचत असल्याचे सांगितले. कार्यक्रमाचे सूत्रसंचालन व आभारप्रदर्शन प्रा. रायप्पा माशाळे यांनी केले. वाचनालयाच्या उपक्रमांमुळे मराठी भाषेची अभिजात परंपरा अधिक दृढ होत असल्याचे मान्यवरांनी नमूद केले.