कल्याण, ता. ५ (बातमीदार) ः बेशिस्त रिक्षाचालकांवर कल्याण आरटीओच्या पथकाने कारवाई करत सरत्या वर्षात लाखो रुपयांचा दंड वसूल केला आहे. एकूण ५५ हजार ७५ रिक्षांवर कारवाई करण्यात आली आहे. यातून १२ लाख ५६ हजार ९७७ रुपयांचा दंड वसूल झाला आहे. कल्याण डोंबिवली शहरात ३० हजारांहून अधिक रिक्षांवर कारवाई झाली.

रिक्षा प्रवासाचे भाडे मीटरने आकारले पाहिजे; मात्र रिक्षाचालक आणि त्यांचे नेते, संघटना नियम धाब्यावर बसवून शहरात व्यवसाय करतात. कल्याण आरटीओमार्फत बैठका घेऊन रिक्षाचालकांनी प्रवासी वर्गाशी सौजन्याने वागावे, प्रवासी वर्गाने मीटर पद्धतीने प्रवास मागितल्यास त्यांना सेवा देणे रिक्षाचालकाला बंधनकारक आहे. तरी रिक्षाचालक सेवा देत नसल्याचे कल्याण आरटीओच्या कारवाईमध्ये उघड झाले आहे. सन २०२० आणि २०२१ हा कालावधी कोरोना महामारीत गेला; मात्र परिस्थिती स्थिर झाल्यानंतर कल्याण आरटीओच्या विशेष पथकाने बेशिस्त रिक्षाचालकांच्या विरोधात कारवाई केली आहे. १ एप्रिल २०२० ते ३१ मार्च २०२१ या कालावधीत केलेल्या कारवाईमध्ये ५८७ बेशिस्त रिक्षाचालकाकडून सुमारे ६ लाख ५५ हजार १५० रुपये दंड वसूल करण्यात आला. १ एप्रिल २०२१ ते ३१ मार्च २०२२ या कालावधीत केलेल्या कारवाईमध्ये ९५७ बेशिस्त रिक्षाचालकाकडून सुमारे १० लाख ५ हजार १५० रुपये दंड वसूल करण्यात आला. १ एप्रिल २०२२ ते ३१ डिसेंबर २०२२ या कालावधीत केलेल्या कारवाईमध्ये १७९० बेशिस्त रिक्षाचालकाकडून सुमारे १९ लाख ९० हजार ७५० रुपये दंड वसूल करण्यात आला.
--------
रिक्षाचालकांनी व्यवसाय करताना सोबत कागदपत्रे ठेवावीत. नियमांचे पालन करताना प्रवासी वर्गाशी सौजन्याने वागा, असे आम्ही आवाहन नेहमीच करतो. बेशिस्त वागणाऱ्यांच्या विरोधात कारवाई आगामी काळात सुरू राहणार आहे.
- विनोद साळवी, उपप्रादेशिक परिवहन अधिकारी