उल्हासनगर, ता. १२ (वार्ताहर) : भाजप नगरसेवकांच्या विकासकामांच्या निधीवरून दुजाभाव करण्यात येत असल्याचा आरोप आमदार गणपत गायकवाड यांनी आयुक्त अजीज शेख व इतर अधिकाऱ्यांसमोर केला. भाजपचे माजी नगरसेवक हे १० ते १५ लाखांचा विकासनिधी मागतात; मात्र हा निधी मंजूर करण्यासाठी चालढकलपणा केला जातो. इतर पक्षांच्या नगरसेवकांच्या पाच ते आठ लाखांच्या निधीला तात्काळ मंजुरी देणारे उल्हासनगर पालिकेचे अधिकारी भ्रष्टाचाराचे धोरण राबवत असल्याचा आरोप आमदार गणपत गायकवाड यांनी करून बाळासाहेबांच्या शिवसेनेच्या नगरसेवकांवर निशाणा साधला. आमदार कुमार आयलानी आणि आमदार गणपत गायकवाड यांनी भाजपच्या शिष्टमंडळासोबत आयुक्त अजीज शेख यांची भेट घेतली. पाण्याचे अमाप बिल आणि त्यावरील व्याजासाठी पाण्याची अभययोजना लागू करावी, अशी मागणी या वेळी करण्यात आली.