नवी मुंबई, ता. २ (वार्ताहर) : जुईनगर आणि सारसोळे भागात राहणाऱ्या दोन मुलींनी बुधवारी (ता. १) गळफास घेऊन आत्महत्या केल्याची घटना उघडकीस आली आहे. यातील एका मुलीने दहावीच्या अभ्यासाचा ताण सहन न झाल्याने; तर दुसऱ्या मुलीने वैयक्तिक कारणावरून आत्महत्या केल्याचे उघडकीस आले आहे. या दोन १६ वर्षीय मुलींच्या आत्महत्येमुळे नवी मुंबईत खळबळ उडाली आहे.

जुईनगरमध्ये आई-वडिलांसह राहणारी १६ वर्षीय एकुलती एक मुलगी नेरूळमधील इंग्रजी माध्यमाच्या शाळेत इयत्ता दहावीत शिकत होती. गुरुवारी (ता. २) तिचा दहावीचा पहिलाच पेपर होता. त्यामुळे एकांतात अभ्यास करता यावा यासाठी तिने बुधवारी रात्री १० वाजण्याच्या सुमारास आई-वडिलांना घराबाहेर पाठवून दिले होते. त्यानंतर या मुलीने घरातील पंख्याला गळफास घेऊन आत्महत्या केली. रात्री ११ वाजण्याच्या सुमारास आई-वडील घरात आल्यानंतर हा प्रकार उघडकीस आला.

नेरूळच्या सारसोळे भागात राहणाऱ्या १६ वर्षीय मुलीने बुधवारी भरदुपारी राहत्या घराच्या बाहेरील आवारात गळफास घेऊन आत्महत्या केली. या घटनेतील मृत मुलगी आई आणि दोन लहान बहिणींसह सारसोळे गावात राहत होती. मूळची नेपाळी असलेली ही मुलगी शाळेत जात नव्हती; मात्र ती आईला घरकामात मदत करत होती. बुधवारी दुपारी आई व बहीण घरात असताना तिने घराबाहेरील गल्लीत गळफास घेऊन आत्महत्या केली. काही वेळानंतर हा प्रकार तिच्या आईच्या निदर्शनास आल्यानंतर तिला शेजाऱ्यांच्या मदतीने डी. वाय. पाटील रुग्णालयात नेण्यात आले; मात्र डॉक्टरांनी तिला मृत घोषित केले. या मुलीच्या आत्महत्येमागचे कारण अद्याप स्पष्ट झाले नसल्याचे पोलिसांनी सांगितले.

अभ्यासाचा ताण सहन न झाल्याने कृत्य?
जुईनगरमधील घटनेतील मुलीने दहावीच्या अभ्यासाचा ताण सहन न झाल्याने आत्महत्या केल्याचे बोलले जात आहे. या मुलीने दहावीची परीक्षा सुरू होण्याच्या आदल्या दिवशी अभ्यासाचा ताण घेऊन आत्महत्या केल्याने परिसरात हळहळ व्यक्त करण्यात येत आहे. नेरूळ पोलिसांनी दोन्ही आत्महत्यांच्या घटनांची नोंद केली आहे.