मुंबई, ता. १० : भारतात निर्माण झालेले एकमेव स्वदेशी विमानवाहू जहाज ‘आयएनएस विक्रांत’ पहिल्या मुंबई भेटीवर आले आहे. शुक्रवारी तिचे मुंबईत मोठ्या दिमाखात स्वागत करण्यात आले. आयएनएस विक्रांतने मुंबई बंदराला पहिल्यांदा भेट दिली आहे. भारतीय नौदलासाठी भारतात तयार करण्यात आलेली आयएनएस विक्रांत विमानवाहू युद्धनौका अत्याधुनिक तंत्रज्ञानाने सज्ज असून, ती आतापर्यंतची सर्वात मोठी युद्धनौका आहे. आयएनएस विक्रांतचे वजन ४५,००० टन असून तिची लांबी २६२ मीटर आहे. विमानवाहू जहाजाच्या हँगरवर १८ मजले, १४ डेक आणि २,३०० कंपार्टमेंट आहेत. आयएनएस विक्रांतमध्ये कार्यरत १५०० कर्मचाऱ्यांच्या वास्तव्याची सुविधा करण्यात आलेली आहे. विक्रांत युद्धनौका फायटर जेट विमान, हेलिकॉप्टर वाहून नेऊ शकते. यात ३० मिग-२९ के विमाने, एमएच- ६० रोमियो हेलिकॉप्टर, कामोव केए- ३१ हेलिकॉप्टर, लाइट कॉम्बॅट एअरक्राफ्ट आदी हलकी हेलिकॉप्टर वाहून नेऊ शकते.