नेरूळ, ता. १४ (बातमीदार) : सीबीडी बेलापूर सेक्टर आठ येथील अंबाजी गोशाळा येथे सोमवारी (ता. १३) साप असल्याची माहिती तेथील कर्मचाऱ्यांनी फोन करून पुनर्वसू फाऊंडेशनला दिली होती. संस्थेचे सर्पमित्र अष्टविनायक मोरे यांनी देण्यात घटनास्थळी पाहणी केली असता लोखंडी जाळीत सहा फूट लांबीचा एक अजगर अडकला होता. अजगर बराच वेळ जाळीत अडकल्याने त्याला हालचाल करणे अशक्य झाले होते. अजगराला बाहेर काढण्यासाठी लोखंडी जाळी पकडीच्या साह्याने तोडण्यात आली. प्रयत्नांची पराकष्टा करत त्या अजगराची सुखरूप सुटका करण्यात यश आले. त्यानंतर या अजगराची तपासणी करण्यात आली. त्याला जाळीमुळे किरकोळ जखमा झाल्याचे लक्षात आले. त्याच्यावर उपचार करत वन विभागाला माहिती देत त्याला सुरक्षितरीत्या जवळच्या जंगलात सोडून देण्यात आले.