मानखुर्द, ता. १९ (बातमीदार) : गोवंडी पोलिसांनी दोघा मोबाईल चोरांना पुणे व अजमेर येथून नुकतीच अटक केली. सोहेल कुरेशी ऊर्फ कालू (वय १९) याला पुण्याच्या वाकड येथून १२ मार्च रोजी आणि यामिन कुरेशी ऊर्फ मोना (वय २३) गुरुवारी (ता. १६) अजमेर येथून रेल्वे पोलिसांच्या मदतीने अटक करण्यात आली. सोहेलविरोधात दोन; तर यामिनविरोधात पाच गुन्ह्यांची नोंद आहे. हे दोघेही खार व ट्रॉम्बे पोलिस ठाण्यातील गुन्ह्यामध्ये फरार होते.

चेंबूरच्या पांजरपोळ येथील चौकात ९ मार्च रोजी एक प्रवासी बसची वाट पाहत उभे होते. त्यावेळी दुचाकीवरून आलेल्या दोघांनी प्रवाशाच्या हातातील मोबाईल हिसकावून पळ काढला होता. त्या प्रवाशाने गोवंडी पोलिस ठाण्यात धाव घेत तक्रार केली. पोलिसांनी गुन्हा नोंदवत गुन्हे प्रकटीकरण अधिकारी उपनिरीक्षक अमर चेडे आणि उपनिरीक्षक पंकज पाटील यांच्या पथकांनी तपास सुरू केला. त्यांनी गुन्ह्याच्या परिसरातील ३५ सीसीटीव्ही फुटेज तपासले. त्यातील चित्रिकरणामध्ये दोघा चोरांची ओळख पटली. खबऱ्यांकडून माहितीच्या आधारे सोहेलला वाकडमधून अटक करण्यात आली. त्याच्याकडून यामिनविषयी माहिती मिळाली. अमर चेडे हे पथकासह अजमेर येथे त्याला पकडण्यासाठी गेले असता तो भुज-बरेली एक्स्प्रेसने प्रवास करत असल्याची माहिती मिळाली. रेल्वे सुरक्षा बलाची मदत घेत पथकाने यामिनला ताब्यात घेतले.