नवी मुंबई, ता. २० (वार्ताहर) : रबाळे गावात राहणाऱ्या एका १९ वर्षीय तरुणाने बारावीत शिकणाऱ्या एका १७ वर्षीय तरुणीशी प्रेमसंबध निर्माण करून तिच्यावर लैंगिक अत्याचार करत अश्लील व्हिडीओ तयार करून ते तिच्या घरच्यांना दाखवण्याची धमकी देत तिच्याकडून रोख रक्कम आणि लाखो रुपये किमतीचे दागिने लुटल्याचा प्रकार उघडकीस आला आहे. शेरसिंग नरपतसिंग राठोड असे आरोपी तरुणाचे नाव असून रबाळे पोलिसांनी त्याच्याविरोधात बलात्कारासह पोक्सो कलमाखाली गुन्हा दाखल करून त्याला अटक केली आहे. या घटनेतील १७ वर्षीय पीडित तरुणी कोपरखैरणेमध्ये राहण्यास असून ती इयत्ता बारावीत शिकत आहे. दरम्यान, घरातील सोन्याचे दागिने गायब झाल्यानंतर पीडित तरुणीच्या आईने केलेल्या चौकशीनंतर शेरसिंग याने तिच्यावर लैंगिक अत्याचार केल्याचे व तो तिला धमकावत असल्याने तिने घाबरून शेरसिंगला दागिने दिल्याचे सांगितले. त्यानंतर पीडित तरुणीच्या आईने पोलिस ठाण्यात धाव घेत तक्रार दाखल केली.