मुंबई, ता. १९ : ईक्यू इंटरनॅशनल यांच्या वतीने पुणे येथे आयोजिलेल्या सूर्याकॉन परिषदेत महाराष्ट्र विद्युत पारेषण कंपनीला (महापारेषण) ग्रीन एनर्जी कॉरिडॉर प्रकल्पात उत्कृष्ट कामगिरीबद्दल पुरस्कार देऊन गौरवण्यात आले. या पुरस्काराबद्दल महापारेषणचे अध्यक्ष व व्यवस्थापकीय संचालक दिनेश वाघमारे यांनी अधिकारी व कर्मचाऱ्यांचे कौतुक केले आहे.
महापारेषणने केंद्र शासनाच्या ग्रीन एनर्जी कॉरिडॉर योजनेत सहभागी होऊन एकूण १६ अतिउच्च दाब वाहिन्या (५९० सर्किट किलोमीटर) व ३६ संलग्न बे ची स्थापना करून एकूण ९३८ मेगावॉट एवढी अपारंपरिक ऊर्जा निष्कासित करण्यासाठी पारेषण मजबुतीकरणाचे काम यशस्वीरीत्या पूर्ण केले आहे. दरम्यान, महापारेषणचे अध्यक्ष व व्यवस्थापकीय संचालक दिनेश वाघमारे यांनी या यशाचे श्रेय अधिकारी व कर्मचाऱ्यांना दिले आहे. या पुरस्काराबद्दल महापारेषणचे अध्यक्ष व व्यवस्थापकीय संचालक दिनेश वाघमारे म्हणाले, ‘महापारेषणच्या यशाचे श्रेय मी माझ्या टीमला देतो. अधिकारी व कर्मचारी यांच्या सातत्यपूर्ण कामगिरीमुळे महापारेषणला अनेक पुरस्कार मिळाले आहेत. महापारेषणने आधुनिक तंत्रज्ञानाची कास धरली आहे. त्यामुळे भविष्यातही महापारेषणचे अधिकारी व कर्मचारी चांगले काम करतील.’ केंद्र शासनाने निर्धारित केलेल्या उद्दिष्टानुसार महापारेषण कंपनी सुमारे ३४०० कोटी रुपयांचे अपारंपरिक ऊर्जा निष्कासनाचे प्रकल्प प्रस्तावित करण्याच्या तयारीत आहे. हे प्रकल्प ग्रीन एनर्जी कॉरिडॉर टप्पा-३ अंतर्गत पूर्ण करण्याचे महापारेषणचे उद्दिष्ट आहे.