मालाड, ता. २ (बातमीदार) ः वडिलोपार्जित मालमत्तेबाबत बनावट कागदपत्रे तयार करून चुलत भावाची ९७.३४ कोटी किमतीची जागा हडप केल्याबाबत एन. एम. जोशी मार्ग पोलिस ठाण्यात पाच जणांवर गुन्हा नोंद करण्यात आला आहे.
जोगेश्वरी पश्चिम येथील रहिवासी मोहम्मद अयाज जाफर कपाडिया यांनी दाखल केलेल्या तक्रारीनुसार त्यांचे आजोबा अयुब हाजी जाफर आणि त्यांचा भाऊ हारून हाजी जाफर यांनी परळ, लोअर परळ आणि ताडदेव भागात आपली मालमत्ता बनवली होती. परस्पर संमतीने हारून हाजी जाफरचा मुलगा इस्माईल हारून याने ताडदेवची मालमत्ता त्यांच्याकडे ठेवली आणि परळ, लोअर परळमधील मालमत्ता तक्रारदाराचे वडील मोहम्मद जाफर अयुब कपाडिया आणि काका अब्दुल लतीफ कपाडिया यांच्याकडे हस्तांतरित केली. काकांच्या मृत्यूनंतर त्यांची मुले भाडे गोळा करून मोहम्मद अयाज जाफर कपाडिया यांच्या वडिलांना देत राहिले; मात्र ते बंद केले. मोहम्मद जाफर अयुब कपाडिया आणि काका अब्दुल लतीफ कपाडिया यांच्या मृत्यूनंतर भावा-बहिणींना आणि चुलत भावांच्या नावे मालमत्ता हस्तांतरित झाली. दरम्‍यान तक्रारीनुसार गेल्या वर्षी जेव्हा मोहम्मद अयाज जाफर कपाडिया यांना या मालमत्ता हस्‍तारणात गोंधळ असल्‍याचे समजले असून नंतर त्‍यांनी तक्रार दाखल केली आहे.