नवी मुंबई, ता. ५ (वार्ताहर) : अमली पदार्थविरोधी पथकाने खारघर सेक्टर-४ मधील ‘लक्ष्मण व्हिला’ या इमारतीवर छापा मारून गाळ्यामध्ये विक्री करण्यासाठी लपवून ठेवण्यात आलेला सुमारे सहा लाख ४४ हजार रुपये किमतीचा ई- सिगारेटचा साठा जप्त केला आहे. या कारवाईत पोलिसांनी अर्जुन भिमा राठोड (वय २७) याला अटक केली आहे. खारघर सेक्टर-४ मधील ‘लक्ष्मण व्हिला’ इमारतीतील महावीर एक्स्प्रेस सर्व्हिस प्रायव्हेट लिमिटेड या गाळ्यांमध्ये ई-सिगारेटचा साठा करून ठेवण्यात आल्याची माहिती अमली पदार्थविरोधी पथकाला मिळाली होती. या माहितीच्या आधारे वरिष्ठ पोलिस निरीक्षक बी. एस. सय्यद यांनी कारवाई करण्याच्या सूचना दिल्यानंतर पोलिस उपनिरीक्षक कुलदीप मोरे व पथकाने गाळ्यावर छापा टाकला. गाळ्यामध्ये बेकायदा साठा करण्यात आलेला तब्बल सहा लाख ४४ हजार रुपये किमतीच्या विविध फ्लेव्हरच्या ई-सिगारेटचा साठा आढळून आला. साठा करून ठेवणाऱ्या अर्जुन राठोड याच्याविरोधात खारघर पोलिस ठाण्यात गुन्हा दाखल करून त्याला अटक केली.