बदलापूर, ता. ६ (बातमीदार) : ठाणे जिल्हा नियोजन समितीच्या सामाजिक न्याय विभागाच्या माध्यमातून तसेच महिला व बालविकास अधिकारी पल्लवी जाधव व समाजसेविका प्रियांका दामले यांच्या पुढाकाराने, बदलापुरात गरजू व विधवा महिलांसाठी शिवणकला प्रशिक्षण व शिवणयंत्राचे वाटप करण्याचा कार्यक्रम बदलापूर पश्चिम बेलवली येथील यशस्विनी भवन येथे पार पडला. शहरातील गरजू व आधारहीन विधवा अशा एकूण १०० महिलांना या वेळी प्रशिक्षण देण्यात येणार आहे. या महिलांच्या सर्वांगीण विकासासाठी व त्यांच्या स्वावलंबनासाठी सामाजिक न्याय विभागाच्या तीन टक्के निधीतून हा उपक्रम बदलापूर शहरात राबविण्यात येत आहे. २ मे रोजी सुरू झालेल्या या दहादिवसीय प्रशिक्षण शिबिरात अनेक महिलांनी सहभाग घेतला आहे.