डहाणू, ता. ७ (बातमीदार) ः पालघर जिल्ह्यात तंत्रशिक्षण विद्यापीठ सुरू करण्याचा प्रयत्न सुरू असून तंत्रशिक्षणातील आयटीआयमध्ये अनेक अभ्यासक्रम आहेत. आपल्या कौशल्यानुसार त्यात प्रावीण्य मिळवा आणि औद्योगिक प्रशिक्षण घेतलेल्या विद्यार्थ्यांना नोकरीच्या संधी आणि स्वतःचा व्यवसाय सुरू करण्यासाठी पाठबळ द्या, असे आवाहन पालघर लोकसभा मतदारसंघाचे खासदार राजेंद्र गावित यांनी केले.
संगणकीय डिजिटल स्पर्धेच्या युगात स्वतःच्या वृद्धी सोबतच आपला समाज, गाव, जिल्हा यांनाही पुढे घेऊन जा, असेही खासदार गावित यांनी सांगितले. चिंचणी येथे कौशल्य रोजगार उद्योजकता व नाविन्यपूर्ण महाराष्ट्र राज्य आयोजित छत्रपती शाहू महाराज युवाशक्ती करिअर मार्गदर्शन शिबिराचे आयोजन करण्यात आले होते, त्या वेळी खासदार राजेंद्र गावित बोलत होते. या कार्यक्रमाला शिक्षणतज्ज्ञ रजनीकांतभाई श्रॉफ, जिल्हा परिषदचे उपाध्यक्ष पंकज कोरे, जिल्हा परिषद सदस्य जयेंद्र दुबळा, चिंचणीचे सरपंच नितेश दुबळा, रमेश वझे, संजय भोई, जिल्हा व्यवसाय शिक्षण प्रशिक्षण अधिकारी महेश कुमार सिदाम यांच्यासह अधिकारी आणि कर्मचारी उपस्थित होते.