तुर्भे, ता. १४ (बातमीदार) : पावणे एमआयडीसीतील आदिवासी पाड्यांमध्ये विविध नागरी समस्या पाचवीलाच पुजल्या आहेत. अशातच गेल्या पाच ते सहा महिन्यांपासून या परिसरात तीव्र पाणीटंचाई आहे. त्यामुळे हंडाभर पाण्यासाठी दीड किलोमीटरची पायपीट करावी लागत आहे.
पावणे एमआयडीसीमधील आदिवासी कुटुंबांचे वाल्मीकी आवास योजनेअंतर्गत बांधलेल्या घरकुलात स्थलांतर केले आहे. पाण्याची व्यवस्था नसतानाही महापालिकेने हा निर्णय घेतला आहे. परिणामी, पावणेतील वारली पाडा येथील ग्रामस्थांना थेंबभर पाण्यासाठी झगडावे लागत आहे. सुरुवातीला काही दिवस पालिकेने टँकरने पाणीपुरवठा करण्यात आला होता; पण घरगुती वापरासाठी पिण्याचे पाणी जुन्या वारली पाड्यातून आणावे लागते होते. काही वर्षांपासून पावणे एमआयडीसातील आदिवासींचा हाच दिनक्रम आहे. सध्या शाळांना सुट्ट्या असल्याने मुलांना संपूर्ण वेळ पाणी भरण्यासाठी खर्ची करावा लागते. आदिवासी महिला तसेच पुरुष मंडळीना रोजनदारी सांभाळून पाणी भरावे लागत आहे.
--------------------------------------------
फुटलेल्या जलवाहिनीचा आधार
नवी मुंबई महापालिकेने या ठिकाणी पाण्याची टाकी उभारली आहे. घराघरात पालिकेने नळजोडणी दिली आहे. पण टाकीत पाणीच नसल्याने जलवाहिनी गंजू लागल्या आहेत. आजही पिण्याच्या पाण्यासाठी जुन्या वारली पाड्यातील नागरिकांना शालिमार कंपनीजवळ फुटलेल्या जलवाहिनीचा आधार घ्यावा लागत आहे. त्यामुळे स्वतःचे मोरबे धरण असलेल्या मनपाच्या कार्यक्षेत्रातील आदिवासींची ‘नळ आहे....पण पाणी नाही’, अशी अवस्था झाली आहे.
-------------------------------------
विकत पाणी घेण्याची वेळ
सध्या नवीन पाड्यामधील रहिवासी जुन्या पाड्यावरील नळाच्या पाण्यावर अवलंबून आहेत. दिवस-रात्र या नळावर पाण्यासाठी झुंबड उडालेली असते. काही वेळा शाब्दिक बाचाबाचीदेखील होते. अशातच एमआयडीसीकडून शुक्रवारी शटडाऊन होत असल्याने सोमवारीच मध्यरात्रीच पाणीपुरवठा होत असल्याने हातावर पोट असणाऱ्या आदिवासींना विकत पाणी घ्यावे लागत आहे.
----------------------------------------
महापालिकेने आमची फसवणूक केली आहे. घर देताना पाण्याची व्यवस्था केली जाईल, असे सांगितले होते. मात्र, अवघे काही दिवस पाणी मिळाले. त्यामुळे प्रशासनाने आमच्या मागण्यांकडे गांभीर्याने लक्ष देऊन पाण्याचा प्रश्न सोडवावा.
- कृष्ण वड, अध्यक्ष, घर बचाव समिती, वारली पाडा
-------------------------------------
माझ्या महिलांचा दिवस पाणी भरण्यातच खर्ची होत आहे. त्यात मुलांनाही आता पाणी भरावे लागते. यंदा उन्हाचा पारा जास्त असल्याने पाणी भरताना खूप त्रास सहन करावा लागतो.
- संतोष गवते, रहिवासी
पाण्यासाठी दीड किलोमीटरची पायपीट.