सकाळ वृत्तसेवा
मुंबई, ता. २२ ः गेल्या वर्षभरापासून रखडलेली स्टेट ट्रान्सपोर्ट को-आॅपरेटिव्ह बँकेच्या निवडणुकीचे वारे वाहू लागले आहे. जिल्हा उपनिबंधक सहकारी संस्थेने निवडणूक कार्यक्रमाची घोषणा केली असून २४ मेपर्यंत उमेदवारी अर्ज घेऊन निवडणूक निर्णय अधिकाऱ्यांकडे सादर करता येणार आहे. त्यामुळे एसटी महामंडळातील कर्मचारी संघटना कामाला लागल्या असून २४ मेनंतर संघटनांचे पॅनल ठरणार आहे.
बँकेच्या एकूण १९ संचालकांसाठी ही निवडणूक होणार आहे. त्यामध्ये सर्वसाधारण १४, महिला प्रतिनिधी २, अनुसूचित जाती आणि जमाती प्रतिनिधी १, इतर मागास प्रतिनिधी १, भटक्या विमुक्त जाती/जमाती विशेष मागास प्रवर्गात प्रतिनिधी १ अशा १९ संचालकांसाठी निवडणूक रंगात येणार आहे. गेल्या पाच वर्ष एसटी महामंडळातील मान्यता प्राप्त असलेल्या महाराष्ट्र राज्य एसटी कामगार संघटनेची बँकेवर सत्ता होती. तब्बल १९ संचालक एसटी कामगार संघटनेने निवडून आणले होते. त्यानंतर आता बँकेवर सत्ता मिळवण्यासाठी विविध संघटनांच्या पॅनेलमध्ये चुरस निर्माण झाली आहे.
...
असा असेल कार्यक्रम
उमेदवारी अर्ज २४ पर्यंत सादर केल्यानंतर २५ मे रोजी उमेदवारी अर्जाची छाननी होणार आहे. वैध उमेदवारी अर्जांची २६ मे रोजी यादी लावण्यात येणार आहे. २६ मे ते ९ जूनपर्यंत उमेदवारी अर्ज मागे घेता येणार आहे. १२ जूनला चिन्ह वाटप केले जाणार आहे. २३ जूनला सकाळी ९ ते सायंकाळी ५ वाजेपर्यंत मतदान होणार असून २५ जूनला मतमोजणी करून निकाल जाहीर केला जाणार आहे. एसटी बँकेचे राज्यभरात ५२ शाखा असून, ९७ हजार सभासद या निवडणुकीत मतदान करणार आहे.