लोगो वापरणे ः सकाळ इम्पॅक्ट
--------------------------------
खारघर, ता. १ (बातमीदार) : मेट्रो पुलाखालील उभ्या केल्या जाणाऱ्या वाहनांमुळे कोंडी होत होती. या वाहनांकडे वाहतूक विभागाचे दुर्लक्ष होत असल्याची बाब ‘सकाळ’ने बातमीतून मांडली होती. त्याची दखल घेत वाहतूक पोलिसांनी मेट्रो पुलाखालील बेकायदा पार्किंगवर कारवाई केली आहे.
खारघर वसाहतीमधून जाणाऱ्या नवी मुंबई मेट्रोच्या पुलाखाली सिडकोने चौपदरी रस्ता उभारला आहे. रस्त्याचा दोन्ही बाजूला दुकाने, हॉटेल, शोरूम आणि विविध बँका आहेत. विशेषतः दुकान मालक, तसेच जवळपास राहणाऱ्या इमारतीत वास्तव्यास राहणारे नागरिकांच्या गाड्या आणि अवजड वाहने मेट्रो पुलाखाली पिलरच्या लागून उभी करत होते. त्यामुळे नेहमी वाहनांची वर्दळ असलेल्या या मार्गावरील एकेरी लेनवरून वाहन चालवताना अनेकदा वाहतूक कोंडी होत होती. या प्रकाराकडे खारघर वाहतूक पोलिस बघ्याच्या भूमिकेत होते. त्यामुळे ‘मेट्रोच्या पुलाखालील बेकायदा वाहनतळ’ या वृत्तातून ‘सकाळ’ने ही बाब मांडली होती. त्यानुसार पोलिसांनी या वाहनांवर कारवाई केली आहे.
------------------------------------
रस्त्यावरच वाहन दुरुस्ती
उत्सव चौकाकडून भारती विद्यापीठकडे जाणाऱ्या मेट्रो पुलाखाली रस्त्यावर गॅरेज व्यावसायिक अनेक दिवसांपासून रस्त्यावरच वाहने उभी करून दुरुस्तीचे काम करीत असतात. रस्त्यावरच वाहने दुरुस्ती केल्यामुळे वाहनचालकांना विविध समस्यांना तोंड द्यावे लागत आहे. वाहतूक पोलिसांनी या वाहनावर कारवाई करून रस्ता मोकळा करावे, अशी मागणी नागरिकांकडून केली जात आहे.