पनवेल, ता. १६ (वार्ताहर) : व्हॉट्सॲपवरून अनोळखी महिलेसोबत मैत्री करणे कामोठेमधील एका व्यावसायिकाला चांगलेच महागात पडले आहे. या व्यावसायिकाने ज्या अनोळखी महिलेसोबत व्हॉट्सॲपवरून मैत्री केली, त्या महिलेने ऑनलाईन गोल्ड व वाईन ट्रेडिंग केल्यास खुप फायदा होईल, असे प्रलोभन दाखवून व्यावसायिकाला रोख रक्कम गुंतवण्यास भाग पाडले. त्यांच्याकडून तब्बल एक कोटी ३८ लाख रुपयांची रक्कम उकळल्याचा प्रकार उघडकीस आला आहे.
या प्रकरणात फसवणूक झालेले ५१ वर्षीय थॉमस हे कामोठे येथे राहण्यास असून नोव्हेंबर २०२० मध्ये निकोल लीन नावाच्या महिलेने व्हॉट्सॲपच्या माध्यमातून थॉमस यांच्यासोबत मैत्री केली होती. त्यानंतर या दोघांमध्ये व्हॉट्सॲप चॅटिंगवरून संवाद वाढल्यानंतर निकोल लीन हिने थॉमस यांचा विश्वास संपादन करून त्यांना गोल्ड ट्रेडिंग करण्यास सांगिलते. त्यासाठी त्यांना मोबाईलवर मालामो ॲप डाऊनलोड करण्यास सांगितले. सुरुवातीला थॉमस यांनी ५० हजार रुपये गुंतवणूक केल्यानंतर त्यांना ५४ हजार रुपये परत मिळाले. त्यामुळे थॉमस यांनी निकोल लीन हिच्या बोलण्यावर विश्वास ठेवून नोव्हेंबर २०२० ते फेब्रुवारी २०२१ या कालावधीत १५ लाख रुपयांचे गोल्ड ट्रेडिंग केले; परंतु त्यातून थॉमस यांना काहीही परतावा मिळाला नाही. त्यात त्यांचे १५ लाख रुपयांचे नुकसान झाले.

-------------
मार्च ते जुलै २०२१ दरम्यान गुंतवणूक
मार्च २०२१ मध्ये निकोल लीन हिने पुन्हा थॉमस यांच्याशी संपर्क साधून वाईन ट्रेडिंग करण्यास सांगितले. थॉमस यांनी निकोल लीन हिच्या सांगण्यानुसार मार्च ते जुलै २०२१ दरम्यान तब्बल एक कोटी २३ लाख ७० हजार रुपयांचे वाईन ट्रेडिंग केले. मात्र पैशांचा परतावा होत नसल्याने आपली फसवणूक होत असल्याचे त्यांच्या लक्षात आले. त्यानंतर त्यांनी कामोठे पोलिस ठाण्यात तक्रार दाखल केली.