कासा, ता. २६ (बातमीदार) : तलासरी येथे परुळेकर महाविद्यालयात मोहनभाई पटेल सभागृहात मराठी वाङ्मय मंडळाचे उद्‍घाटन करण्यात आले. यावेळी कला अकादमी व मराठी वाङ्मय मंडळाच्या वतीने ''काळजातल्या कविता'' या विषयावर कार्यक्रम आयोजित केला होता. प्रमुख पाहुणे म्हणून प्रा. डॉ. बाळासाहेब लबडे व शाहीर शाहिद खेरटकर उपस्थित होते. महाविद्यालचे प्राचार्य डॉ. बी. ए. राजपूत यांनी कार्यक्रमाचे प्रास्ताविक करताना मराठी वाङ्मय मंडळाची आवश्यकता का आहे? तसेच मराठी वाङ्मय मंडळामार्फत वर्षभरात महाविद्यालयात आयोजित करण्यात येणाऱ्या विविध उपक्रमांची माहिती सांगितली.

‘काळजातल्या कविता’ या कार्यक्रमाची सुरुवात झाली. प्रा. बाळासाहेब लबडे यांनी मराठी भाषेची महती सांगितली. शाहीर शाहिद खेरटकर यांनीही विद्यार्थ्यांना मार्गदर्शन केले. ''उन्हाचा कहर, पडे पावसाचे पाणी गाई बळीराजा गाणी, मी कर्म शोधतो आहे, बाबासाहेब तुमची आणखी एक कविता, तळे साचले प्रेम सांडून गेले उभ्या संसारी दिस भांडूनी गेले, हृदयातल्या घरांची उघडा दारे समाज सुधारा रे आदर्श उभारा रे'' या कविता सादर केल्या. कार्यक्रमाचे सूत्रसंचालन कला अकादमी प्रमुख प्रा. दीपक वाकडे यांनी केले.