सकाळ वृत्तसेवा
ठाणे, ता. १८ : ठाणे पालिकेच्या छत्रपती शिवाजी महाराज रुग्णालयात घडलेल्या मृत्यूप्रकरणी चौकशी समिती गठीत करण्यात आली आहे. या समितीने गुरुवारी दुपारपासून ठाणे मुख्यालयात धडक दिली. या वेळी रुग्णालयाच्या अधिष्ठात्यांसह डॉक्टरांची चौकशी करण्यात आली. काही महत्त्वाची कागदपत्रे ताब्यात घेतली आहेत. रात्री ११ वाजेपर्यंत रुग्णालयाची झाडाझडती घेतल्यानंतर शुक्रवारी (ता. १८) पुन्हा तपासणी केल्याची माहिती सूत्रांनी दिली.
मागील आठवड्यात ठाणे पालिकेच्या छत्रपती शिवाजी महाराज रुग्णालयात एकाच दिवशी १८ रुग्णांच्या मृत्यूचे तांडव घडले. या प्रकरणाची गांभीर्याने दाखल घेत मुख्यमंत्री एकनाथ शिंदे यांनी चौकशी समिती नेमली. या समितीच्या माध्यमातून रुग्णालयातील मृत्यूच्या घटनांची चौकशी करून २५ ऑगस्टपर्यंत अहवाल सादर करण्याच्या सूचना दिल्या. त्यानुसार गुरुवारी चौकशी समितीने ठाणे पालिका मुख्यालयावर धडक दिली. या वेळी रुग्णालयाच्या अधिष्ठात्यांसह डॉक्टरांची सखोल चौकशी करण्यात आली. त्यानंतर समितीतील सदस्यांनी कळवा रुग्णालयाकडे धाव घेत रुग्णालयाची रात्री ११ वाजेपर्यंत पाहणी केली.

------------------
महत्त्वाची कागदपत्रे ताब्यात
प्रत्येक वॉर्डात जाऊन रुग्णांना वेळेत उपचार मिळतात की नाही, याचीही चौकशी समितीने खातरजमा केली आहे. तसेच रोज उपचारासाठी किती रुग्ण येतात, किती शस्त्रक्रिया होतात, शिवाय ज्या रुग्णांचा मृत्यू झाला त्यांचीदेखील माहिती घेण्यात आली. त्यातही त्यांचा मृत्यू नेमका कशामुळे झाला, याची माहितीही त्यांनी घेतली आहे. तसेच काही महत्त्वाची कागदपत्रे हाती घेण्यात आली असल्याची माहिती समोर आली आहे. त्यानंतर शुक्रवारीही दुपारी दोन वाजता या समितीमधील सदस्यांनी कळवा रुग्णालयात हजेरी लावली होती. त्यावेळी काही शिल्लक कागदपत्रेदेखील त्यांनी आपल्या ताब्यात घेतली असल्याची माहिती सूत्रांनी दिली.