बोईसर, ता. ३१ (बातमीदार) : लोकशाही यशस्वी करायची असेल तर मतदार हा जागरूक हवा. जागरूक मतदार हाच लोकशाहीचा आधारस्तंभ आहे, असे मत उपजिल्हाधिकारी अपर्णा सोमाणी-आरोलकर यांनी व्यक्त केले. जिल्हा निवडणूक अधिकारी कार्यालय, पालघर, आम्ही शिक्षक सामाजिक संस्था, मतदार नोंदणी अधिकारी कार्यालय, पालघर आणि श्री पी. एल. श्रॉफ महाविद्यालय संयुक्त विद्यमाने निवडणूक साक्षरता मंडळाचा उद्‍घाटन समारंभ आयोजित केला होता. यावेळी त्या बोलत होत्या.

निवडणूक साक्षरता मंडळाच्या पालघर जिल्ह्याचे प्रकल्प समन्वयक सुशील शेजुळे यांनी निवडणूक साक्षरता मंडळाच्या स्थापनेमागील भूमिका, त्याची कार्ये आणि उद्देश यांच्यावर प्रकाश टाकला. तसेच पुढील काही दिवसांत जिल्ह्यातील महाविद्यालयात निवडणूक साक्षरता मंडळे स्थापन करण्यात येणार आहेत. महाविद्यालयात नवीन मतदार नोंदणी शिबिराचे आयोजन कारण्यात येणार असल्याचे त्यांनी सांगितले.

प्रा. जनार्दन शिंदे यांनी लोकशाहीचे स्वरूप सांगून ती यशस्वीपणे राबविण्यासाठी मतदारांची भूमिका अतिशय महत्त्वाची असल्याचे मत मांडले. लोकशाही ही एक आदर्श प्रणाली असून तिचा भाग होण्याचे सौभाग्य भारतीयांना लाभले, याबद्दल त्यांनी समाधानही व्यक्त केले. १८ वर्षे पूर्ण झालेल्या प्रत्येक विद्यार्थ्याने मतदार नावनोंदणी करून निवडणूक प्रक्रियेत अवश्य सहभागी व्हावे, असे आवाहन त्यांनी विद्यार्थ्यांना केले.

कार्यक्रमाच्या अध्यक्षस्थानी चिंचणी-तारापूर शिक्षण संस्थेच्या सदस्या डॉ. रमिलाबेन श्रॉफ उपस्थित होत्या. तहसीलदार रमेश शेंडगे व संस्थेचे चेअरमन रजनीकांतभाई श्रॉफ यांचे कार्यक्रमासाठी मार्गदर्शन लाभले. उद्यापासून विद्यार्थ्यांच्या मतदार नावनोंदणी शिबिराला सुरुवात करण्यात येईल, अशी घोषणाही यावेळी करण्यात आली.

यावेळी नायब तहसीलदार संभाजी पावरा, उपप्राचार्या डॉ. सुचिता करवीर, प्रा. चित्रा अष्टेकर, प्रा. रंजिता कपूर, परवीन सोलंकी, प्रा. अमिता पाटील, प्रा. जयकांत ठाकूर, प्रा. निष्ठा केळकर, तसेच शिक्षक-शिक्षकेतर कर्मचारी आणि विद्यार्थी बहुसंख्येने उपस्थित होते.