सकाळ वृत्तसेवा
ठाणे, ता. १२ : मुंबई महापालिकेकडून हवेच्या घटत्या गुणवत्तेबाबत कडक पावले उचलली जात आहेत. सरकारही याबाबत गंभीर असून लवकरच संपूर्ण एमएमआर क्षेत्रात वायुप्रदूषण रोखण्यासाठी नवीन मार्गदर्शक तत्त्वे जारी करण्यात आली आहेत. असे असताना, ठाण्यात प्रशासनाचे दुर्लक्ष होत असल्याचे समोर येत आहे. ठाणे शहरात धूळ नियंत्रणासाठी बसवलेल्या मशीन बंद असून त्या धूळखात आहेत. त्यामुळे महापालिका प्रशासन प्रदूषणाबाबत गंभीर नसल्याचे दिसून येत आहे; तर रस्ता खोदण्यात आल्याने मशीनचा वीजपुरवठा बंद झाला असून, त्यामुळे माजिवडा चौकातील धूळ नियंत्रण मशीन बंद असल्याचा दावा पालिका प्रशासनाने केला.
ठाणे शहरातून जाणारे महामार्ग, प्रमुख रस्ते आणि अंतर्गत रस्त्यांवर सतत वाहनांची वर्दळ असते. या वाहतुकीमुळे आवाज आणि धुळीच्या कणांचे प्रमाण वाढले आहे. प्रदूषणामुळे मुंबई शहरातील हवेची पातळी मोठ्या प्रमाणात कमी होत असल्याचे चित्र गेल्या काही दिवसांपासून समोर येत आहे. काही दिवसांपूर्वी मुंबई महापालिकेने नागरिकांना मास्क वापरण्याच्या सूचना दिल्या होत्या. तसेच, विकासकांना बांधकामाच्या ठिकाणी पाणी शिंपडणारी यंत्रणा आणि धूळ शोषणारी मशीन कार्यान्वित करण्याचा इशारा देण्यात आला आहे. ठाणे शहरातही अनेक ठिकाणी इमारती बांधण्याचे काम सुरू आहे. शहरात मोठ्या प्रमाणात धुळीचे लोट पाहायला मिळत आहेत.
केंद्र सरकारच्या राष्ट्रीय स्वच्छ हवा कृती आराखड्यांतर्गत सात महिन्यांपूर्वी मिळालेल्या सुमारे एक कोटींच्या रकमेतून ठाणे महापालिकेने शहरात बसविलेली धूळ नियंत्रण यंत्रे बंद अवस्थेत असल्याचे समोर आले आहे. धुळीचे प्रदूषण कमी करण्यासाठी मशीनद्वारे पाण्याची फवारणी केली जाते. शहरातील सर्वात वर्दळीच्या चौक असलेल्या माजिवडा आणि विटावा येथे प्रत्येकी दोन मशीन बसविण्यात आल्या आहेत. पावसाळ्यापूर्वी ही यंत्रे सुरू होती. पावसाळ्यात ही यंत्रे बंद पडली. आता पाऊस संपून महिना उलटला, तरी ही यंत्रे बंद अवस्थेत आहेत.

..........................
अशा प्रकारे मिस्ट स्प्रे मशीन करते काम
हे यंत्र जमिनीपासून १५ फूट उंचीवर बसवण्यात आले असून ते ३२० अंश फिरते. त्यातून पाणी ३० मीटर अंतरापर्यंत पाणी उडते. त्या पाण्यामुळे रस्त्यावरील धूळ ओलसर होते आणि धुळीचे कण हवेत मिसळत नाहीत. रस्त्यावरील ओलसर धुळीमुळे वाहनांना कोणतीही हानी होत नाही आणि मिस्ट स्प्रे मशीन हवेतील २.५ मायक्रॉन धूळ शोषून घेते आणि बाहेर पाणी आणि स्वच्छ हवा सोडते.

.........................
विटावा येथे यंत्रणा कार्यरत असून, माजिवडा चौकातील यंत्रणा लवकरच कार्यान्वित होणार आहे. काही तांत्रिक कारणांमुळे ही यंत्रणा बंद आहे.
- मनीषा प्रधान, मुख्य प्रदूषण नियंत्रण अधिकारी