सकाळ वृत्तसेवा
मुंबई, ता. २८ : परळच्या वाडिया रुग्णालयात सोमवारी एका पाच वर्षांच्या मुलीला ब्रेन डेड घोषित केल्यानंतर तिचे अवयवदान करण्यात आले आहेत. मुंबईतील हे ४२ वे अवयवदान असून बाल अवयवदानात हे तिसरे रुग्णालय आहे. या मृत मुलीचे हृदय, मूत्रपिंड आणि कॉर्निया दान केले गेले. विशेष बालक असलेल्या या मुलीला गेल्या आठवड्यात चेंबूरच्या रुग्णालयात दाखल करण्यात आले होते. गेल्या २२ नोव्हेंबर रोजी तिला वाडिया रुग्णालयात हलवण्यात आले. मुलीची प्रकृती गंभीर असल्याने व्हेटिंलेटरवर ठेवण्यात आले होते. उपचारांदरम्यान डॉक्टरांनी २६ नोव्हेंबर रोजी तिला ब्रेन-डेड घोषित केले. त्यानंतर प्रत्यारोपण समन्वयक आणि टीमने अवयवदानाबद्दल मुलीच्या पालकांचे समुपदेशन केले. पालकांनी सुरुवातीला टाळाटाळ केली; मात्र तिच्या अवयवदानानंतर चार रुग्णांना नवीन जीवन मिळेल, या हेतूने त्यांनी अवयवदानाचा निर्णय घेतला.

या चिमुरडीचे हृदय सोमवारी सकाळी ग्रीन कॉरिडॉरमार्गे दिल्लीतील रुग्णालयात पाठवण्यात आले; तर एक किडनी परळच्या केईएम रुग्णालयातील शेवटच्या टप्प्यातील किडनी रुग्णामध्ये प्रत्यारोपित करण्यात आली आणि दुसरी किडनी ठाण्यातील ज्युपिटर रुग्णालयातील रुग्णामध्ये प्रत्यारोपित करण्यात आली.

..
तिसरे बाल देहदान
मुंबईत या वर्षातील हे तिसरे बाल देहदान ठरले. जुलैमध्ये पाच वर्षांच्या चिमुरडीच्या पालकांनी तिचे यकृत वांद्रे येथील लीलावती रुग्णालयात दान केले. फेब्रुवारी २०१९ मध्ये मुंबईत दोन वर्षांच्या मुलाचे देहदान झाले, जो आतापर्यंतचा सर्वांत लहान दाता होता. २०१९ मध्ये शहरात ७६ अवयव दानकर्ते होते, परंतु त्यानंतरच्या कोविड-१९ साथीच्या आजारामुळे घट झाली, २०२० मध्ये केवळ ३० देहांचे दान झाले आणि २०२१ मध्ये ३१ दान झाले होते.