नवी मुंबई महापालिकेची आरोग्य यंत्रणा सज्ज
वाशी, ता. २३ (बातमीदार)ः काही राज्यांमध्ये कोविडचा जेएन -१ विषाणूने बाधित रुग्ण आढळून आले आहेत. यात सिंधुदुर्ग तसेच नवी मुंबई शहराला लागून असलेल्या ठाणे शहरातही रुग्ण आढळून आहेत. त्यामुळे महापालिकेची आरोग्य यंत्रणा अलर्ट झाली असून सर्व विभागांना सज्ज राहण्याचे आदेश दिले गेले आहेत.
नाताळ सणामुळे सर्वत्र उत्साहाचे वातावरण आहे. अशातच राज्यात कोविडच्या जेएन -१ विषाणूने बाधित रुग्ण सापडल्याने चिंता वाढली आहे. या विषाणूंच्या संसर्गाने सर्दी, खोकला, अंगदुखी, डोकेदुखी तसेच दीर्घकाळ कोरडा खोकला राहत असल्याने सहव्याधी (कोमॉर्बिड) असणारे रुग्ण, आजारी ज्येष्ठ नागरिक, गरोदर स्त्रिया, लहान मुले यांच्या सुरक्षेची गरज आहे. गर्दीच्या ठिकाणे, आजाराची लक्षणे असल्यास मास्क वापरणे गरजेचे आहे. त्यामुळे अशा स्थितीत खबरदारी म्हणून वाशी, नेरूळ व ऐरोली येथील महापालिकेच्या तीन रुग्णालयात व्हेंटिलेटर्ससह ६० आयसीयू बेड्स, २०० ऑक्सिजन बेड्स, कोविड आरोग्य केंद्र सुविधा आणि २०० सर्वसाधारण बेड्सची काळजी केंद्रे तात्काळ कार्यान्वित केली आहेत. त्याचप्रमाणे दैनंदिन ओपीडीमध्ये जे रुग्ण संशयित आहेत. त्याच्यांवर बारकाईने लक्ष ठेवण्यासाठी नोडल अधिकाऱ्यांची नेमणूक केली आहे.
------------------------------
आरटीपीसीआर लॅब कार्यान्वित
नवी मुंबई महापालिकेची स्वत:ची ४ हजार चाचण्या प्रतिदिन क्षमतेची आरटीपीसीआर लॅब आहे. या ठिकाणी चाचण्या अधिक सक्षमतेने करण्याबाबत विशेष लक्ष देण्याच्या सूचना आयुक्तांनी केल्या आहेत. शिवाय येथील चाचण्यांवर कोविड नियंत्रणासाठी नेमलेल्या नोडल अधिकाऱ्याने बारकाईने लक्ष देण्याचे आदेश देण्यात आले आहेत.
------------------------------------
कोविडचा नवीन विषाणू आढळला असला तरी नागरिकांनी घाबरण्याची गरज नाही. कोणत्याही अफवांवर विश्वास ठेवू नये. तसेच चुकीची माहिती प्रसारित होणार नाही, याची दक्षता घ्यावी. त्याचप्रमाणे आजाराची लक्षणे असल्यास गर्दीच्या ठिकाणी जाणे टाळावे.
- राजेश नार्वेकर, आयुक्त, नवी मुंबई महापालिका