नेरळ, ता. २३ (बातमीदार) ः दोन देशी पिस्तूल आणि ५ जिवंत काडतुसासह एक जणाला ताब्यात घेण्यात स्थानिक गुन्हे अन्वेषण शाखेला यश आले आहे. हे पिस्तूल आणि काडतूस कुणाला देण्यासाठी आणण्यात आले होते, यामागे कुणाच्या हत्येचा कट होता का, या प्रश्‍नांचा तपास पोलिस करत आहेत.

स्थानिक गुन्हे शाखेचे फौजदार राजा पाटील यांना २१ डिसेंबर रोजी गुप्त बातमीदाराकडून माहिती मिळाली होती. एक जण कर्जत चारफाटा येथे देशी पिस्तूल आणि काडतूसासह येणार असल्याचे त्यांना समजले होते. पाटील यांनी ही माहिती पोलिस निरीक्षक बाळासाहेब खाडे यांना दिली. त्यानुसार खाडे यांनी पथकासह सापळा रचला. याळी चारफाटा येथे संशयित व्यक्तीला ताब्यात घेण्यात आले. त्याची झडती घेतली असता त्याच्याकडे दोन देशी पिस्तूल आणि पाच जिवंत काडतूस सापडली. आरोपीचे नाव अनिल क्षेत्रे (वय२९) असे आहे. ही कामगिरी रायगड जिल्ह्याचे पोलिस अधीक्षक सोमनाथ घार्गे, अपर पोलिस अधीक्षक अतुल झेंडे यांचे मार्गदर्शनाखाली स्थानिक गुन्हे शाखेचे पोलस निरीक्षक बाळासाहेब खाडे यांच्या अधिपत्याखाली साहायक पोलिस निरीक्षक नागेश कदम, सहाय्यक फौजदार राजेश पाटील, पोलिस हवालदार संदीप पाटील, राकेश म्हात्रे, यशवंत झेमसे यांनी केली.