सकाळ वृत्तसेवा
ठाणे, ता. ६ : महानगरपालिकेच्या छत्रपती शिवाजी महाराज रुग्णालयातील एका वरिष्ठ डॉक्टरने निवासी डॉक्टरला शिवीगाळ करीत मारहाण केल्याची घटना घडली. या घटनेची गांभीर्याने दखल घेत पालिका आयुक्त अभिजीत बांगर यांनी तत्काळ अहवाल देण्याचे आदेश रुग्णालयाच्या अधिष्ठात्यांना दिले होते. अहवालानुसार पालिका प्रशासनाने वरिष्ठ डॉक्टरांना ३० दिवसांच्या सक्तीच्या रजेवर पाठवले आहे. त्यांचा पदभार इतर वरिष्ठ डॉक्टरांकडे देण्यात आला असल्याची माहिती पालिका प्रशासनाने दिली.
राजीव गांधी वैद्यकीय महाविद्यालयात पदवी पूर्ण करणारे विद्यार्थी एक वर्षाच्या करारावर कळवा रुग्णालयात निवासी डॉक्टर म्हणून काम करतात. रुग्णालयातील बाह्य रुग्ण कक्षापासून ते अनेक विभागांची जबाबदारी त्यांच्यावर असते. दरम्यान, शुक्रवारी (ता. ५) रुग्णालयातील दुसऱ्या मजल्यावरील शस्त्रक्रिया विभागात दोन निवासी डॉक्टर सेवा बजावत होते. त्या वेळी रुग्ण उपचारासाठी दाखल करण्यावरून त्यांचा वरिष्ठ डॉक्टर संजय बर्नवाल यांच्याशी वाद झाला. यातून डॉ. बर्नवाल यांनी त्यांना शिवीगाळ करत त्यातील एका डॉक्टराला मारहाण केली. घटनेची माहिती मिळताच पालिका आयुक्तांनी रुग्णालयाचे अधिष्ठाता यांना प्राथमिक अहवाल तत्काळ पाठवण्याचे निर्देश दिले. अहवाल प्राप्त झाल्यानंतर डॉ. संजय बर्नवाल यांना ३० दिवसांच्या सक्तीच्या रजेवर पाठवण्यात आले आहे. त्यांचा पदभार दुसऱ्या वरिष्ठ डॉक्टरांकडे देण्यात आला असल्याची माहिती पालिका आयुक्त अभिजित बांगर यांनी दिली.

...........................
वाद कशामुळे झाला
कळवा रुग्णालयात काही दिवसांपूर्वी एक लहान मुलगी उपचारासाठी दाखल झाली होती. तिला पुढील उपचारासाठी सायन रुग्णालयात उपचारासाठी पाठवण्यात आले होते. यावरून रुग्णालय प्रशासनावर टीका झाली होती. हे प्रकरण ताजे असतानाच गुरुवारी रुग्णालयात ६ ते ७ वर्षांची एक मुलगी उपचारासाठी आली होती. निवासी डॉक्टरने मुलीला सायन रुग्णालयात नेण्याचा सल्ला नातेवाईकांना दिला. याबाबत तिच्या नातेवाईकांनी लोकप्रतिनिधीच्या माध्यमातून वरिष्ठ डॉक्टरांशी संपर्क साधला आणि त्यानंतर तिच्यावर रुग्णालयातच उपचार करण्याच्या सूचना वरिष्ठ डॉक्टरांनी निवासी डॉक्टरला दिल्या. यावरूनच शुक्रवारी डॉ. बर्नवाल आणि निवासी डॉक्टर यांच्यात वाद झाला होता.