पनवेल, ता. ३ (बातमीदार) : गुटखा विक्री करणाऱ्या दोघा जणांना पनवेल गुन्हे शाखा कक्ष २ च्या पथकाने तालुक्यातील जुई गावाजवळ कारवाई केली. मनन अन्सारी (वय २०) व राजू उर्फ सेन्तू जमशेद शेख (वय ४४) या दोघांना पोलिसांनी ताब्यात घेतले. वरिष्ठ पोलिस निरीक्षक उमेश गवळी यांच्या मार्गदर्शनाखाली पोलिस उपनिरीक्षक मानसिंग पाटील, सुनील गिरी व त्यांच्या पथकाने तालुक्यातील जुई गाव येथे जाणाऱ्या रस्त्याच्या शेजारी असलेल्या मोकळ्या मैदानात मनन अन्सारी व राजू शेख यांना संशयावरून ताब्यात घेतले. त्यांची तपासणी केली असता त्यांच्याकडे विविध प्रकारच्या १० हजार रुपये किमतीच्या पान मसाल्यांच्या पुड्या हस्तगत केल्या. या प्रकरणी आणखी एका आरोपीचा शोध घेण्यात येत आहे.