फडके विद्यालयात जागतिक महिला दिन उत्साहात
नवी मुंबई : पनवेल येथील आद्यक्रांतिवीर वासुदेव बळवंत फडके विद्यालयात जागतिक महिला दिनाचे औचित्य साधून आरोग्याचा योगमंत्र देण्यात आला. यावेळी माजी विद्यार्थिनी, मुख्याध्यापिका, शिक्षक वृंद, पालक प्रतिनिधी उपस्थित होते. कार्यक्रमाची सुरुवात सरस्वती वंदनेने करण्यात आली. विद्यालयातील इंग्रजी माध्यमातील क्रीडा शिक्षिका वैभवी मराळ यांनी मंत्रोच्चार, ओंकार, योगासने व सूर्यनमस्कार या चतु:सूत्री कार्यक्रमाच्या माध्यमातून उपस्थित सर्व महिलांना आरोग्याचा योगमंत्र दिला. महिला दिनाचे औचित्य साधून महिला पालकांना व माजी विद्यार्थिनींना योगाचे आणि प्राणायाम क्रियांचे महत्त्व पीपीटीच्या माध्यमातून पटवून देण्यात आले. तसेच प्रात्यक्षिकेतून विविध आसने व सूर्यनमस्कार सर्व महिलांनी शिक्षकांसोबत उत्साहाने केले. मुख्याध्यापकांच्या मार्गदर्शनाखाली या कार्यक्रमाचे आयोजन करण्यात आले होते. यावेळी माजी विद्यार्थ्यांच्या पालकांनी आपल्या मनोगतातून कार्यशाळेचे कौतुक केले. विद्यालयाच्या मुख्याध्यापिका मनीषा महाजन यांनी क्रीडा शिक्षकांचे कौतुक केले आणि उपस्थितांचे आभार मानून समस्त महिलांना आरोग्याच्या अभिनव वाटचालीसाठी शुभेच्छा दिल्या.