पालघर, ता. २८ (बातमीदार) : विद्यार्थ्यांनी सर्वांगीण विकासासाठी विविध स्पर्धांमध्ये सहभाग घ्यावा. अपयश आले तरी खचून जाऊ नका. यशासाठी पुन्हा पुन्हा प्रयत्न करा. मेहनत केली तर यशस्वी होणारच, असे आवाहन मुंबई येथील आर्यन एज्युकेशन सोसायटीच्या संयुक्त कार्यवाह विपुला राऊत यांनी केळवे येथे केले.

केळवे येथील नूतन विद्या विकास मंडळाच्या आदर्श विद्यामंदिर शाळेचा वार्षिक पारितोषिक वितरण समारंभ आणि इर्षा या शालेय हस्तलिखिताचा प्रकाशन समारंभ बुधवारी (ता. २७) शितळा देवीच्या सभागृहात आयोजित केला होता. त्या कार्यक्रमात प्रमुख पाहुण्या म्हणून त्या बोलत होत्या. शाळेतील वर्षभरात विद्यार्थ्यांनी विविध स्पर्धांमध्ये भाग घेऊन यशस्वी झालेल्या विद्यार्थ्यांचा गुणगौरव करून त्यांना पारितोषिक देऊन त्यांचा सत्कार त्यांच्या हस्ते करण्यात आला. तसेच त्यांच्या हस्ते इर्षा या हस्तलिखिताचे प्रकाशन करण्यात आले. या वेळी विश्वस्त व माजी मुख्याध्यापक हरिहर पाटील, संस्थेचे सचिव अशोक राऊत, सरपंच संदीप किणी, मुख्याध्यापिका नूतन राऊत, संस्थेचे उपाध्यक्ष मनीषा राऊत, विनोद पाटील, राजेंद्र राऊत, अशोक राऊत आदी उपस्थित होते.