तुर्भे, ता. २५ (बातमीदार) : सिडकोने नियोजन करून वसवलेल्या सानपाडा नोडमध्ये गरजेनुसार सोयी-सुविधा विकसित न केल्याने हा नोड वाहतूक कोंडीत अडकला आहे. हार्बर रेल्वे मार्गाच्या पश्‍चिमेकडे वसलेल्या नोडमध्ये प्रवेश करण्यासाठी एकच मार्ग आहे. पर्यायी मार्ग नसल्याने सानपाड्यातील रहिवाशांना रोज वाहतूक कोंडीला सामोरे जावे लागते. सानपाडा रेल्वे स्थानकापासून पूर्व-पश्‍चिम असा प्रवास करण्यासाठी एकच भुयारी मार्ग हा पर्याय आहे. त्यामुळे कायम या मार्गावर वाहनांची कोंडी होत असल्याचे वाहनचालकांना सकाळ आणि संध्याकाळी तारेवरची कसरत करावी लागत आहे.
वाढती लोकसंख्या व त्यासोबत वाढलेल्या वाहनांच्या संख्येमुळे सानपाडा येथील भुयारी मार्ग अपुरा पडत असल्याचे दिसून येत आहे. नियमित हजारो वाहने या भुयारी मार्गाचा वापर करीत असतात; परंतु नियमित सकाळी व सायंकाळी अपुऱ्या भुयारी मार्गामुळे या ठिकाणी वाहतूक कोंडी नित्याचीच होत असल्यामुळे नागरिकांचा वेळ व इंधन वाया जात आहे. अनेकदा रेल्वे स्थानकाच्या दुतर्फा वाहतूक कोंडी मोठ्या प्रमाणात होत असल्यामुळे प्रवासी वाहनचालक व नागरिकांमध्ये वाद निर्माण होत असतात. यावर कायस्वरूपी तोडगा म्हणून भुयारी मार्ग किंवा पर्यायी उड्डाणपूल उभारण्यात यावे, अशी मागणी सामाजिक कार्यकर्ते नीलेश कचरे यांनी पालिका आयुक्तांकडे केली आहे.