वसई (बातमीदार) : तापमानात कमालीची वाढ झाली आहे. त्यामुळे नागरिक घामाघूम होत आहेत, अशातच वसई-विरार शहरात विजेचा लपंडाव सुरू असल्याने सर्वसामान्य नागरिकांसह रुग्ण, गरोदर माता, ज्येष्ठ नागरिक त्रासले आहेत. इस्पितळ, संस्थांमध्येदेखील वीज खंडित होत असल्याने त्याचा फटका सहन करावा लागत आहे. एकीकडे प्रवाशांना उन्हाचे चटके सहन होत नाहीत. त्यांना अंगावर पुरळ येणे, चक्कर येणे, हाताला चटके बसणे अशा प्रसंगातून जावे लागत आहे. त्यातच गृहिणी, घरून काम करणारे नागरिक, व्यावसायिक वर्ग आदींना वीजपुरवठा वारंवार खंडित होत असल्याने उष्णतेची झळ अधिक जाणवू लागली आहे. विजेचा वापर अधिक होऊ लागल्याने विजेवर येणारा भार वाढला आहे, तसेच पावसाळी कामे महावितरण विभागाकडून सुरू असल्याने वीज खंडित केली जात आहे. मात्र, उष्णतेचा सामना करणाऱ्या नागरिकांच्या अंगाची लाहीलाही होत आहे.