मुंबई, ता.१ : लोकसभा निवडणुकीच्या पार्श्वभूमीवर स्वीप कार्यक्रमांतर्गत मुंबई शहर जिल्ह्यात विविध ठिकाणी मतदार जनजागृतीसाठी विविध कार्यक्रम सुरू आहे. त्याचाच एक भाग म्हणून जिल्हाधिकारी तथा जिल्हा निवडणूक अधिकारी मुंबई शहर संजय यादव यांच्या मार्गदर्शनाखाली बुधवारी (ता.१) मतदार जनजागृती अभियानांतर्गत सायकल रॅली काढण्यात आली होती. जिल्हा प्रशासनाच्या वतीने झालेल्या या रॅलीला विविध वयोगटातील ४५० पेक्षा अधिक सायकलस्वार सहभागी झाले होते. मुंबईतील वांद्रे म्हाडा कार्यालयापासून प्रबोधनकार ठाकरे नाट्यगृह बोरिवली, वांद्रे ते अंधेरी क्रीडा संकुल, वांद्रे ते एनसीपीए नरिमन पॉइंट आणि वांद्रे ते कालिदास सभागृह, मुलुंड अशा चार मार्गांवर ही रॅली काढण्यात आली. रॅली दरम्यान विविध ठिकाणी मतदान करण्याचा संदेश दिला गेला. सहा वर्षांच्या सायकलस्वारांपासून ते ज्येष्ठ नागरिकांचा तसेच व्यावसायिकांचा उत्साहपूर्ण सहभाग होता.