डेंगी, मलेरियावर जपानी तेलाचा उतारा
पालिकेने आयात केले रसायन
सकाळ वृत्तसेवा
मुंबई, ता. १ : पावसाळा सुरू होताच मुंबईत पावसाळ्यातील आजारांचा प्रादुर्भावही सुरू होतो, विशेषत: मलेरिया आणि डेंगी या आजारांचा प्रसार करणाऱ्या डासांना रोखण्यासाठी मुंबई महापालिकेने जपानमधून खास रसायन आयात केले आहे. या रसायनाच्या झालेल्या चाचणीत महापालिकेला अवघ्या १५ मिनिटांत डास मृत झाल्याचे आढळून आले आहे.
पावसाळा सुरू झाला की, मलेरिया आणि डेंगीचा प्रादुर्भाव वाढू लागतो. गेल्यावर्षी मुंबईत मलेरियाचे सात हजार, तर डेंगीचे साडेपाच हजारांहून अधिक रुग्ण आढळले होते. यंदा अवघ्या सहा महिन्यांत मलेरियाचे दोन हजार ४००, तर डेंगीचे ३८१ रुग्ण आढळले आहेत. मलेरिया आणि डेंगीच्या प्रतिबंधासाठी महापालिकेच्या कीटकनाशक विभागाने या आजारांचे वाहक असलेल्या डासांना रोखण्यासाठी विविध उपाययोजना सुरू केल्या आहेत. सायफेनोथ्रिन नावाचे रसायन महापालिकेने जपानच्या सुमितोमो केमिकल कंपनीकडून आयात केले आहे.

४५०० लिटर रसायन आयात -
महापालिकेच्या कीटकनाशक विभागाच्या वरिष्ठ अधिकाऱ्याने सांगितले की, सुमारे साडेचार हजार लिटर रसायन आयात करण्यात आले आहे. ते सुमारे तीन ते चार महिने चालणार आहे. या रसायनाची चाचणी गेल्या आठवड्यात करण्यात आली, जी डासांना मारण्यासाठी अत्यंत प्रभावी ठरली.

या रसायनाच्या माध्यमातून मलेरिया-डेंगी आजाराचा प्रसार रोखता येईल. एखाद्या व्यक्तीचे रक्त शोषल्यानंतर डास एकाच खोलीत एकाच ठिकाणी थांबतात, कारण रक्त शोषल्याने डासांचे शरीर जड होते. अशा परिस्थितीत हे डास बंद खोलीत धुक्यामुळे मरतात, असे कीटकनाशक विभागाचे प्रमुख चेतन चौबळ म्‍हणाले.

‘एनवीबीडीसीपी’ची मान्यता
या महिन्याच्या सुरुवातीला जागतिक आरोग्य संघटना आणि एनवीबीडीसीपीची टीम मुंबईत होती. राष्ट्रीय वेक्टर बोर्न डिसीज कंट्रोल प्रोग्राम (एनवीबीडीसीपीचे)नेदेखील ‘सायफेनोथ्रिन’ला मान्यता दिली आहे. शहरात मलेरिया व डेंगीचे सातत्याने वाढत असलेले रुग्ण पाहता कृती आराखड्याला बळकटी देण्याचे काम सुरू आहे.

पावसाळ्यात डेंगी आणि मलेरियाचा सामना करण्यासाठी विशेष पद्धतीचा अवलंब केला जाईल, ज्यामध्ये रुग्णांची सर्वाधिक संख्या असलेल्या विशिष्ट वॉर्डांना लक्ष्य केले जाईल.
डॉ. सुधाकर शिंदे, अतिरिक्त महापालिका आयुक्त