मारहाणप्रकरणी गुन्हा दाखल

पेण, ता. १५ (वार्ताहर) : पेण तालुक्यातील कोलेटीवाडी येथील दामोदर बाळाराम ठाकूर (वय ५६, रा. कोलेटीवाडी, पो. पळस, ता. पेण) यांनी दिलेल्या तक्रारीनुसार त्याच गावातील भोय कुटुंबाने मारहाण करून जीवे ठार मारण्याची धमकी दिल्याप्रकरणी दामोदर ठाकूर यांनी वडखळ पोलिस ठाण्यात गुन्हा दाखल केला आहे. याबाबत सविस्तर वृत्त असे की, दामोदर बाळाराम ठाकूर यांच्या घरामध्ये पत्नी वैशाली ठाकूर (५२), मुलगा विजय ठाकूर (३२), त्याची पत्नी रेणुका ठाकूर (३०), त्यांची मुले अन्विता ठाकूर (पाच) व अथर्व ठाकूर (तीन), तसेच मुलगा अक्षय ठाकूर (२६), त्याची पत्नी सृष्टी ठाकूर असे एकत्रित कुटुंब आहे. मुलगा अक्षय ठाकूर याने याच गावातील शेजारी असणाऱ्या भोय कुटुंबातील मुलीशी प्रेमविवाह केल्याने त्यांच्या मनात असणारा राग आणि आमचे गावामध्ये जुने घर असून ते भोय यांच्या घराला लागूनच आहे. त्या जुन्या घराचे नव्याने बांधकाम करावयाचे असल्याने त्या सर्व गोष्टींचा राग मनात धरून दिलीप भोय व त्यांच्या अनेक नातेवाइकांनी लोखंडी रॉड, लाथा-बुक्क्यांनी मारहाण करून जीवे ठार मारण्याची धमकी दिल्याने त्यांच्याविरोधात वडखळ पोलिस ठाण्यात गुन्हा दाखल करण्यात आला असून अधिक तपास वडखळ पोलिस करीत आहेत.